Nos Tin Cu Resisti Tentacion

HENDE a yega di pidi bo haci un cos malo?— Nan a bisa bo cu si bo no hacie bo ta cobarde? Of nan a bisa bo cu lo bo pasa dushi, y cu no ta nada malo?— Ora hende haci asina cu nos, nan ta purba tenta nos, esta, hinca nos den tentacion.

Kico nos mester haci ora nos sinti tentacion? Nos tin cu dal bai numa y haci cos malo?— Yehova Dios lo no keda contento si nos haci esei. Pero bo sa ken si lo keda contento?— Si, Satanas e Diabel.

Satanas ta enemigo di Dios, y Satanas ta nos enemigo tambe. Nos no por mir’e, pasobra e ta un spirito. Pero e si por mira nos. Un dia Diabel a papia cu Hesus e Gran Maestro, y a purba tent’e. Laga nos wak kico Hesus a haci. E ora ei nos lo sa kico pa haci ora nos tambe sinti nos tenta.

Tur ora Hesus kier a haci loke Dios kier. Pa e laga tur hende sa esei, el a batisa den Riu Yordan. Y asina cu Hesus a caba di batisa, Satanas a purba tent’e. Bijbel ta bisa cu ‘shelo a habri’ pa Hesus. (Mateo 3:16) Por ta esei kiermen cu e ora ei Hesus a cuminsa corda tur cos di su bida di prome, esta, ora e tawata den shelo serca Dios.

Despues di su bautismo Hesus a bai den un desierto pa pensa riba e cosnan cu el a cuminsa corda. Cuarenta dia y cuarenta anochi a pasa. Tur e dianan ei Hesus no a come nada. Pesei, Hesus a haya hopi hamber. Y ta net e ora ei Satanas a purba hinca Hesus den tentacion.

Diabel a bis’e: ‘Si bo ta e yiu di Dios, manda e piedranan aki pa nan bira pan.’ Esta bon un pida pan lo a baha! Pero ta berdad cu Hesus por a pone piedra bira pan?— Si, e por a hacie. Bo sa dicon? Pasobra Hesus ta e Yiu di Dios, y e tawatin poder special.

Abo lo a haci un piedra bira pan si Diabel a pidi bo hacie?— Hesus tawatin hamber. Kico bo ta kere? E no tawatin mag di hacie ni un biaha so?— Hesus tawata sa cu ta malo pa e uza su poder pa un cos asina. Yehova a dun’e poder pa e hala hende serca Dios, no pa e uz’e pa su mes.

Pesei, na luga di haci loke Satanas a bisa, Hesus a bis’e kico ta para skirbi den Bijbel: “Hende lo no biba di pan so, ma di tur palabra cu ta sali for di boca di Dios.” Hesus tawata sa cu haci loke Yehova gusta ta mas importante cu cuminda.

Pero Diabel a bolbe purba. El a hiba Hesus Herusalem y a pon’e para riba un parti di e tempel te na halto. E ora ei Satanas a bisa: ‘Si bo ta yiu di Dios, tira bo curpa abou. Pasobra ta para skirbi cu Dios su angelnan lo scapa bo pa bo no dal bo curpa.’

Dicon Satanas a bisa asina?— El a bisa e cos ei pa tenta Hesus pa e haci un cos di bobo. Pero Hesus a bolbe keda sin scucha Satanas. El a bisa Satanas: “Ta para skirbi: ‘No pone Señor bo Dios na prueba.’” Hesus tawata sa cu ta malo pa pone Yehova na prueba door di pone bo bida den peliger.

Pero ainda Satanas no a stop. Awor el a hiba Hesus riba un sero masha halto. Anto el a mustr’e tur reino, esta, tur gobierno di mundo y nan gloria. E ora ei Satanas a bisa Hesus: “Tur e cosnan aki lo mi duna bo, si bo tira bo curpa abou y adora mi.”

Pensa riba loke Satanas a ofrece Hesus. Ta berdad cu tur reino, tur gobierno di hende, ta di Satanas?— Wel, corda cu Hesus no a nenga cu nan ta di Satanas. Y si nan no tawata di Satanas, Hesus lo a bis’e esei. Kiermen, ta berdad anto cu Satanas ta goberna tur nacion na mundo. Bijbel ta asta yam’e “e prins di e mundo aki.”—Huan 12:31.

Kico abo lo haci si Diabel priminti di duna bo un cos si bo ador’e?— Hesus tawata sa cu ta malo pa adora Diabel, ni maske kico Diabel por a dun’e. Pesei Hesus a bisa: ‘Bai djaki, Satanas! Pasobra Bijbel ta bisa cu ta Yehova bo Dios bo mester adora, y ta e so bo mester sirbi.’—Mateo 4:1-10; Lucas 4:1-13.

Nos tambe sa haya tentacion. Bo sa kico asina nan por ta?— Wak un ehempel aki. Laga nos bisa cu bo mama a traha un bolo masha dushi mes pa dessert, anto el a bisa bo no mishi cu ne te ora boso bai come. Pero awor bo tin hopi hamber, y bo ta sinti tentacion pa com’e. Lo bo tende di bo mama?— Satanas kier pa bo desobedece bo mama.

Corda riba Hesus. E tambe tawatin hopi hamber. Pero e tawata sa cu haci Dios contento ta mas importante cu come. Si bo haci loke bo mama ta bisa, bo ta mustra cu bo ta manera Hesus.

Otro mucha lo por bisa bo guli un par di pildo. Nan por bisa bo cu e pildonan ta bai pone bo sinti masha bon mes. Pero e pildonan ei por ta droga. Nan por haci bo bira hopi malo. Nan por mata bo mes. Of, kisas un hende ta duna bo un sigaria y bisa bo cu si bo no hum’e, bo ta cobarde. Sigaria tambe tin droga aden. Kico bo ta haci e ora ei?—

Corda riba Hesus. Satanas a purba pone Hesus risca su bida door di bis’e tira su curpa abou for di e tempel. Pero Hesus a nenga di hacie. Kico abo lo haci si un hende bisa bo haci un cos peligroso, pasobra si bo no hacie bo ta cobarde?— Hesus no a tende di Satanas. Y abo tampoco no mester tende di ningun hende cu kier pone bo haci malo.

Un dia un hende por pidi bo adora un imagen, kisas como parti di un ceremonia na scol. Pero Bijbel ta bisa cu nos no mag haci e cos ei. (Exodo 20:4, 5) Nan por asta bisa bo cu si bo nenga di hacie, bo no tin mag di bai scol mes mas. Kico bo ta haci e ora ei?—

Ta facil pa haci bon ora tur otro hende ta haci bon. Pero ora otro hende ta purba pone nos haci malo, por bira hopi duro pa nos haci bon. E hendenan ei por bisa bo cu e cos cu nan ta haci no ta dje malo ei. Pero e pregunta importante ta: Kico Dios ta bisa tocante e cos ei? Ta Dios sa miho.

Pesei, ni maske kico hende bisa, nunca nos no mester haci cos cu Dios a bisa cu ta malo. Asina, semper nos lo haci Dios felis, y nunca nos lo no haci Satanas contento.