Ken Dios Ta?

Hopi hende ta bisa cu nan ta kere den Dios. Pero si bo puntra ken Dios ta, bo ta haya diferente contesta. Tin ta bisa cu Dios ta un hues cruel cu ta cla pa castiga hende pa nan picanan. Tin otronan ta bisa cu Dios ta amoroso, y sin importa kico nos haci, semper e ta pordona nos. Y tin otronan cu ta kere cu Dios ta leu y no ta interesa den nos. Como resultado, hopi hende ta pensa cu ta imposibel pa haya sa ken Dios ta.

Ta importante pa haya sa ken Dios ta? Si, pasobra ora bo siña conoce Dios mas mihor, bo bida ta haya sentido. (Echonan 17:26-28) Y mas bo hala cerca Dios, mas e lo stima bo y yuda bo. (Santiago 4:8) Anto unabes cu bo a siña conoce Dios bon, bo por haya bida eterno.​—Juan 17:3.

Con bo por siña conoce Dios? Pensa un rato riba un hende cu bo conoce bon, manera un bon amigo. Con boso a bira amigo? Primeramente bo a haya sa con yam’e, y despues bo a haya sa, entre otro, kico ta su personalidad, kico e ta gusta y kico e no ta gusta, y tambe loke el a haci y kico e tin pensa di haci. Loke a atrae bo na e persona ta cu bo a siña conoc’e.

Asina tambe, bo por siña conoce Dios si bo considera e siguiente preguntanan:

• CON DIOS SU NOMBER TA?

• CON DIOS TA?

• KICO DIOS A HACI DEN PASADO?

• KICO DIOS LO HACI DEN FUTURO?

• KI BENEFICIO LO BO SACA SI BO SIÑA CONOCE DIOS?

A prepara e revista aki specialmente pa contesta e preguntanan ey cu yudansa di Bijbel. E articulonan lo yuda bo haya sa ken Dios ta. Pero no esey so, nan lo yuda bo tambe pa haya sa ki beneficio lo bo saca si bo bira amigo di Dios.