Kico e Reino di Dios Lo Logra?

LOKE E REINO DI DIOS A LOGRA CABA

Den e articulo anterior, nos a considera e señal cu Hesus a duna. E señal ey ta duna evidencia bon cla cu e Reino di Dios a ser estableci den cielo cu Hesucristo como Rey.

Bijbel ta bisa cu ora Hesus a cuminsa goberna, el a saca Satanas cu su demoñonan for di cielo. Actualmente, nan por afecta solamente loke ta sosode riba Tera. Esey ta un di e motibonan cu cos a bira asina malo desde aña 1914.—Revelacion 12:7, 9.

Aunke cu dia pa dia situacion ta birando mas pio, Hesus como Rey di e Reino di Dios a haci varios cos pa yuda hende rond mundo. Hesus ta dirigi e obra mundial di educacion biblico cu el a predeci, y esey a yuda hopi hende siña y aplica principionan di Bijbel den nan bida. (Isaias 2:2-4) Miyones di hende a siña con pa tin un bida di famia feliz y pa no laga trabou of cosnan material bira e cos di mas importante den nan bida. E hendenan ey a siña con pa mehora nan bida awor y pa bira e tipo di hende cu Dios kier pa biba bou di su gobernacion.

KICO E REINO DI DIOS LO LOGRA DEN FUTURO?

Aunke cu Hesus ta reina den cielo, gobierno humano ainda ta goberna riba Tera. Pero Dios a bisa Hesus: “Goberna meymey di bo enemigonan.” (Salmo 110:2) Pronto, Hesus lo bin destrui su enemigonan y caba cu tur e problemanan cu ta afecta esnan cu kier obedece Dios.

Durante e tempo ey, e Reino di Dios lo tuma accion:

• E lo caba cu religion falso. Tur religion cu a siña hende mentira tocante Dios y cu a haci bida di hende dificil lo no t’ey mas. Bijbel ta compara religion falso cu un prostituta. Su destruccion lo ta un sorpresa pa hopi hende.—Revelacion 17:15, 16.

• E lo pone un fin na gobernacion di hende. E Reino di Dios lo tuma accion y pone un fin na tur gobierno di hende.—Revelacion 19:15, 17, 18.

• E lo elimina hende malbado. Kico lo pasa cu esnan cu ta determina pa haci loke ta malo y ta nenga di obedece Dios? Bijbel ta bisa: “E malbadonan lo wordo corta kita for di Tera.”—Proverbionan 2:22.

• E lo elimina Satanas y su demoñonan. Satanas y su demoñonan lo no por “gaña e nacionnan mas.”—Revelacion 20:3, 10.

Kico tur esaki lo nifica pa esnan cu kier biba bou di e Reino di Dios?

KICO E REINO DI DIOS LO HACI PA HUMANIDAD?

Como Rey den cielo, Hesus lo logra loke ningun gobernante humano no por a logra. E lo haya yudansa di 144.000 cogobernante, kendenan a ser scogi for di humanidad. (Revelacion 5:9, 10; 14:1, 3) E lo haci sigur cu Dios su boluntad lo cumpli rond mundo. Kico e Reino di Dios lo haci pa su habitantenan riba Tera?

• E lo caba cu maleza y morto. “Ningun habitante lo no bisa: ‘Mi ta malo.’” Y “lo no tin morto mas.”—Isaias 33:24; Revelacion 21:4.

• E lo trece berdadero paz y siguridad. “E prosperidad [of, “paz”, NW] di bo yiu hombernan lo ta grandi.” Y “cada un di nan lo sinta bou di su palo di wendruif y bou di su palo di figo, y ningun hende lo no spanta nan.”—Isaias 54:13; Mikeas 4:4.

• E lo zorg pa nos tin trabou agradabel pa haci. “Mi scoginan lo disfruta di e obra di nan mannan pa hopi tempo. Nan lo no traha envano.”—Isaias 65:22, 23.

• E lo resolve problemanan di medioambiente. “Tera seco y desierto lo ta contento, y Araba lo regociha y floria manera rosa.”—Isaias 35:1.

• E lo siña hende kico nan mester haci pa biba pa semper. “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.”—Juan 17:3.

Dios ta desea pa bo por disfruta di e bendicionnan ey. (Isaias 48:18) E siguiente articulo lo splica kico bo por haci awor pa disfruta di e futuro maraviyoso aki.