No Tene Miedo di Predica den Negoshi

1. Si nos tin miedo di predica den negoshi, dicon nos no mester perde animo?

¹ E idea so di predica den negoshi sa duna bo miedo? Si esey ta e caso, no perde animo, pasobra apostel Pablo mes, kende tabata un homber sin miedo, mester a “tuma un curashi” pa predica. (1 Tes. 2:2) Ban trata algun pregunta cu sa bini padilanti y tambe algun sugerencia practico.

2. Dicon bo no mester pensa cu bo ta stroba e trahado?

² E Trahado Lo Pensa Cu Mi Ta Strob’e? Den hopi negoshi, e deber di un trahado ta di stop cu loke e ta haci y atende e hende cu cana drenta. Ademas, mayoria di biaha nan ta masha cortes, ya cu nan por mira bo como un posibel cliente. Si bo ta amabel y ta bisti na un manera representabel, nan lo trata bo cu respet.

3. Kico bo por haci pa e clientenan no rabia?

³ Mi Tin cu Predica ora Tin Hopi Cliente? Lo ta bon pa scoge un momento cu no tin hopi cliente den e negoshi, por ehempel ora e habri. Pa e clientenan no rabia, warda te ora e gerente of e trahado ta su so prome cu bo acerc’e; anto tene bo presentacion cortico.

4. Kico bo por bisa ora bo ta predica den negoshi?

⁴ Kico Mi Por Bisa? Si den e negoshi tin varios trahado, papia cu e persona encarga. Bo por bis’e: “Masha poco biaha nos ta haya hende cu ta traha den negoshi na cas; pesey nos ta bishita nan na trabou. Mi sa cu bo ta trahando, pues lo mi ta masha breve.” Pa evita cu nan por confundi bo cu un salesman, kisas ta mihor pa no trece e punto di donacion padilanti, a menos cu nan kier sa con nos trabou ta ser financia. Dependiendo di e tipo di negoshi, bo por puntra e gerente si bo tin mag di papia brevemente cu e otro trahadonan. Uza e mesun presentacion cu nan. Si un trahado ta ocupa, corta bo presentacion y laga un tratado p’e. Si no ta posibel pa papia cu e otro trahadonan, puntra si bo por laga literatura den e cantina of na un otro luga.

5. Kico ta duna nos motibo pa predica cu curashi den teritorio di negoshi?

⁵ Hesus y Pablo a predica cu curashi na hende cu nan a haya na nan luga di trabou, y bo tambe por hacie. (Mat. 4:18-21; 9:9; Echo. 17:17) Pidi Jehova duna bo curashi y pa yuda bo keda trankil. (Echo. 4:29) Un cos ta sigur, den teritorio di negoshi semper lo bo haya hende pa papia cu ne. Pues, dicon no purba e forma di predica aki?