Con pa Mehora Nos Sirbishi: Predica den Teritorio di Negoshi

Dicon Esey Ta Importante: Mayoria di hende ta traha hopi ora pa dia. Pesey, tin biaha ta mihor pa hiba e mensahe di Reino na nan trabou. Predica den teritorio di negoshi ta interesante y productivo pasobra semper tin hende y por lo general e trahadornan ta amabel cu hende cu nan ta mira como posibel cliente. Pa publicadornan por tin exito, nan mester uza tacto, ser atento y nan mester ta un bon ehempel den nan forma di bisti y nan apariencia. (2 Cor. 6:3) E superintendente di sirbishi mester wak bon cu ki frecuencia e publicadornan ta predica den teritorio di negoshi y ken ta haci esey.

Con pa Haci Esaki:

Prepara un presentacion cortico. Si nos tuma mucho tempo di e trahador, kisas den futuro nos no ta haya chens mas pa papia cu ne.
Pasa na un ora cu e negoshi of compania ta menos druk, por ehempel, ora e caba di habri.
Purba di papia prome cu e manager y sea amabel. Bo por bis’e: “Nos ta haci un bishita cortico na e hendenan cu ta traha aki ya cu no ta facil pa nos haya nan na cas.” Duna un presentacion cortico y ofrec’e un tratado, revista of un otro publicacion. Ta mihor pa no trece e asunto di donacion dilanti, a menos cu nan kier sa con nos trabou ta ser financia, pa evita cu nan por confundi nos cu un salesman.
Si e manager ta amabel, puntr’e si bo por papia brevemente cu e otro trahadornan. Na algun negoshi of compania, ta mihor pa puntra si bo por laga literatura den cantina.
Sea atento y flexibel. Por ehempel, si un trahador ta papia cu un cliente of ta ocupa, warda te ora e ta cla pa bo acerc’e.

Purba di Haci Esaki Durante e Luna Aki:

Durante bo siguiente Adoracion Como Famia, entrena un presentacion cortico cu bo por uza si bo ta traha den teritorio di negoshi.