“Keda na Paz cu Tur Hende”
1. Ki conseho di Bijbel nos mester corda ora un doño di cas rabia cu nos?
1 E pueblo di Jehova ta un pueblo pacifico cu ta predica un mensahe di paz. (Isa. 52:7) Sinembargo, tin hende ta rabia ora nos bishita nan. Den un situacion asina, kico por yuda nos keda trankil y na paz cu e doño di cas?—Rom. 12:18.
2. Dicon ta importante pa nos compronde reaccion di e doño di cas?
2 Compronde e Motibo: Tin hende ta rabia pasobra nan ta contra di e berdad, pero otronan ta rabia pa motibonan cu no tin nada di haber cu nos sirbishi. Kisas nos a bishita nan na un mal momento. Of e doño di cas ta rabia debi na un problema personal. Y hasta si ta nos mensahe ta pon’e cunsumi, esey muy probablemente ta debi na loke otro hende a bis’e di nos como Testigonan. (2 Cor. 4:4) Ora nos compronde dicon e ta reacciona asina, esey lo yuda nos keda trankil y evita di tuma su reaccion como algo personal.—Prov. 19:11.
3. Con nos por mustra respet na e doño di cas?
3 Mustra Respet: Tin hopi hende den teritorio cu ta masha pega na nan creencianan. (2 Cor. 10:4) Nan tin derecho di dicidi si nan kier scucha of no. Hamas nos lo kier falta respet pa e doño di cas su creencianan of lag’e sinti cu nos ta mas sabi cu ne. Si e doño di cas pidi nos pa bay for di su cas, respetuosamente nos ta cumpli cu su peticion.
4. Kico ta nifica papia cu gracia?
4 Papia cu Gracia: Hasta si nan zundra nos, nos contesta mester ta suave y cu gracia. (Col. 4:6; 1 Ped. 2:23) En bes di drenta den discusion, nos mester busca puntonan cu nos tin en comun. Kisas nos por puntra e doño di cas na un manera amabel kico ta e motibo di su obhecion. Sinembargo, tin biaha ta mihor pa no sigui cu e combersacion y pone e doño di cas rabia mas ainda.—Prov. 9:7; 17:14.
5. Ki beneficio nos lo haya ora nos keda na paz cu tur hende den sirbishi?
5 Si nos ta pacifico, e doño di cas kisas lo corda con nos a reacciona y lo scucha e mensahe e proximo biaha cu un Testigo purba di papia cu ne. (Rom. 12:20, 21) Hasta si e ta keda para riba su punto, bo no sa nunca, algun dia e por bira nos ruman. (Gal. 1:13, 14) Sea cu e acepta e berdad of no, si nos mustra dominio propio y keda na paz cu tur hende, nos lo honra Jehova y dorna nos siñansa.—2 Cor. 6:3.