E Palabra di Dios Ta Poderoso
1. Kico ta e tema pa e dia special di asamblea pa e aña di sirbishi 2014?
1 Bijbel ta diferente for di tur cos cu a origina cu hende imperfecto. E tin poder pa cambia nos, pa pone nos pensamento- y camindanan na harmonia cu e boluntad di Jehova. Pero, con poderoso e Palabra di Dios ta? Con nos por haci pleno uzo di su poder den nos bida? Con nos por uz’e na un manera mas eficaz pa yuda otronan? Nos ta sigur cu tur hende lo ser edifica spiritualmente segun cu e puntonan aki ta ser trata durante e programa di dia special di asamblea prepara pa e aña di sirbishi 2014. Su tema ta “E Palabra di Dios ta Poderoso” y e ta basa riba Hebreonan 4:12.
2. Nos mester scucha pa haya contesta pa cua preguntanan?
2 Haya Contesta pa e Preguntanan Aki: Segun cu bo ta scucha e programa, haci anotacion di e contesta pa e preguntanan aki bou.
• Dicon nos mester tin confianza den Jehova su Palabra? (Sal. 29:4)
• Con nos por experencia e poder di e Palabra di Dios den nos bida? (Sal. 34:8)
• Con bo por haci bon uzo di e poder di e Palabra di Dios den sirbishi? (2 Tim. 3:16, 17)
• Con nos por evita di bira victima di e poder engañoso di e mundo di Satanas? (1 Juan 5:19)
• Hoben, con bo por tin exito den bo sirbishi na Dios? (Jer. 17:7)
• Con nos por bira poderoso hasta ora nos ta debil? (2 Cor. 12:10)
• Kico ta e clave pa e Palabra di Dios por sigui transforma nos, aunke nos tin cu lucha cu actitud y custumbernan fuertemente hancra? (Efe. 4:23)
3. Ademas di scucha e programa, con mas nos por beneficia di e dia special di asamblea?
3 Nos lo beneficia masha hopi mes di e informacion importante aki! Ademas, e dia special di asamblea, mescos cu e asamblea di circuito y congreso di districto, lo duna nos e oportunidad pa habri nos curason hancho y gosa di asociacion cu nos rumannan di otro congregacion. (Sal. 133:1-3; 2 Cor. 6:11-13) Pues, traha tempo pa asocia cu bo amigonan bieu y pa forma amistad nobo. Si un orador bishitante, manera un superintendente di districto of un ruman di Betel, ta asigna na boso dia special di asamblea, pakico no probecha di e ocasion pa duna tanto e como su casa un bonbini? Si, nos tin hopi motibo pa anhela e binidero dia special di asamblea!