Uza Bo Ruta di Revista pa Cuminsa Estudio di Bijbel
1. Dicon Jehova su organisacion tin hopi tempo caba ta anima nos pa tin un ruta di revista?
1 Hopi hende no ta interesa den studia Bijbel cu nos, pero nan ta gusta lesa nos revistanan si. Pesey, pa hopi tempo caba Jehova su organisacion ta anima nos pa tin un ruta di revista. Ora hende ta lesa nos revistanan cu regularidad, hopi biaha nan ta crea un anhelo pa e Palabra di Dios. (1 Ped. 2:2) Cu tempo, nan por lesa algo cu ta lanta nan interes y motiva nan pa acepta un estudio di Bijbel.
2. Con nos por cultiva interes di e hendenan cu nos tin riba nos ruta di revista?
2 ‘Muha’ e Simianan di e Berdad: En bes di djis laga e revistanan y bira bay, combersa cu e persona y purba di cera un laso di amistad cu ne. Esaki lo yuda bo conoce su circunstancia-, interes- y creencianan, pa asina bo por yud’e mihor. (Prov. 16:23) Prepara pa cada bishita. Si ta posibel, resalta brevemente un punto interesante y un texto biblico cu tin den e revista. Asina, tiki tiki nos ta muha e simianan di e berdad cu tin den su curason. (1 Cor. 3:6) Despues di cada bishita, nota e fecha, e literatura cu bo a laga y tambe e tema y texto cu boso a considera.
3. Cu ki frecuencia nos mester bolbe bishita esnan cu nos tin riba nos ruta di revista?
3 Cu Ki Frecuencia Bo Mester Bolbe? Bo tin cu bolbe un biaha pa luna pa entrega e ultimo revistanan na esnan cu ta riba bo ruta. Sinembargo, dependiendo di bo circunstancianan y interes dje persona, bo por opta pa bishit’e cu mas frecuencia. Por ehempel, un of dos siman despues di a laga e revistanan, bo por bolbe y bisa: “Mi a pasa un rato asina pa mustra bo un punto for di e revistanan cu mi a laga pa bo.” Esaki lo habri e persona su apetit pa lesa un articulo en particular. Si el a les’e caba, bo por puntr’e kico e ta pensa di e articulo y papia brevemente riba dje. Of si e persona ta gusta lesa nos literatura, bo por bolbe y ofrec’e sea e tratado, foyeto of buki cu nos tin como oferta e luna ey.
4. Kico nos por haci de bes en cuando pa haya sa si esnan cu nos tin riba nos ruta di revista ta interesa pa studia Bijbel?
4 No warda pa e persona pidi bo un estudio di Bijbel. Abo mes tuma e iniciativa. Hasta si el a nenga un estudio di Bijbel den pasado, de bes en cuando bo por uza e articulo “Pregunta Cu Bijbel Ta Contesta” di E Toren di Vigilancia y wak si e kier analis’e cu bo. Kisas bo por cuminsa un estudio na porta mes. Pero, si bo no logra cuminsa un estudio, bo por sigui hiba e revistanan p’e pa cultiva su interes.