Con pa Mehora Nos Sirbishi: Cultiva Interes di e Personanan Riba Bo Ruta di Revista

Dicon Esey Ta Importante: Hopi hende gusta lesa nos revistanan pero nan no kier studia Bijbel cu nos. Kisas nan ta satisfecho cu nan religion of nan ta pensa cu nan no tin tempo pa studia. Sinembargo, segun cu nan ta lesa e revistanan regularmente, nan por crea un anhelo pa e Palabra di Dios. (1 Ped. 2:2) Porta tin un articulo cu por lanta nan interes of nan circunstancianan por cambia. Bishitanan breve y regular por yuda nos haya sa den kico nan ta interesa y ki preocupacion nan tin, y nan por haya mas confianza den nos. Cu tempo, kisas nos por cuminsa un estudio di Bijbel cu nan.

Con pa Haci Esaki:

Traha tempo tur luna pa hiba e edicionnan recien di E Toren di Vigilancia y ¡Despertad! pa e persona. Kisas bo por bishit’e na un otro ocasion durante e luna pa anim’e pa lesa un articulo di e revistanan cu bo a dun’e of pa laga e publicacion cu nos tin como oferta e luna ey. Haci anotacion.—Wak Nos Ministerio di Reino di januari 2014, pag. 3.
Prepara pa cada bishita. En bes di djis duna e persona e revista anto bay, purba di combersa cu ne y sea amigabel. Asina ta bira mas facil pa bo cultiva su interes.
Sea atento na oportunidadnan pa cuminsa un estudio. Si un persona riba bo ruta puntra bo kico Bijbel ta bisa tocante un cierto tema, trece un publicacion di estudio p’e cu ta contesta su pregunta y analis’e hunto. Prome cu bo bay, haci un pregunta relaciona cu e tema anto trat’e na e siguiente bishita. Si boso ta combersa riba un base regular y na un manera sistematico uzando Bijbel of un di nos publicacionnan di estudio, bo a cuminsa un estudio di Bijbel. Bo a ofrece e persona e foyeto Bon Noticia y a mustr’e con e por studia Bijbel den un par di minuut? Bo a mustr’e e videonan Dicon Analisa Loke Bijbel Ta Bisa? y Con un Curso di Bijbel Ta Bay? Hasta si e persona a yega di bisa bo cu e no kier studia, su circunstancianan por cambia. Pesey, dicon bo no ta purba atrobe?

Purba di Haci Esaki Durante e Luna Aki:

Traha un lista di tur persona cu bo por cuminsa un ruta di revista cu ne. Ofrece nan e edicion recien di e revistanan y bisa nan cu lo bo trece e siguiente edicion pa nan.