Un Manera Emocionante pa Predica na Luganan Publico
1. Kico congregacionnan cu tin areanan caminda tin hopi hende ta cana ta ser anima pa haci?
1 Congregacionnan cu tin areanan caminda tin hopi hende ta cana ta ser anima pa organisa e trabou di predica na luganan publico, uzando sea mesa of stand portatil di literatura. Si uza stand portatil, por lo menos un publicador mester para of sinta banda di dje. Pero den caso di e mesa mester tin dos publicador pa atend’e. Ta bon pa e publicadornan cu haya e asignacion aki ta amabel y acercabel. Si un persona acerca e stand, un di e publicadornan por cuminsa combersa cu ne, bisando: “Bo a yega di puntra bo mes kico Bijbel ta bisa tocante e topico aki?” Mientrastanto, un of dos publicador por keda den bisindario di e stand y duna testimonio informal.
2. Conta un experencia cu ta demostra e importancia di predica na luganan publico uzando un mesa di literatura.
2 E manera nobo aki a duna bon resultado. Hopi hende a cuminsa studia Bijbel. Por ehempel, un mucha muher cu ta bay universidad a dicidi di skirbi un articulo tocante testigonan di Jehova, pero e no por a haya un Salon di Reino. E siguiente siman el a mira un mesa di literatura na e universidad. El a cuminsa un estudio di Bijbel, y awor e mes ta un publicador batisa cu ta participa den e manera di predica aki.
3. Con e publicadornan cu a participa den e manera di predica aki ta sinti?
3 Un ruman muher cu a disfruta di e manera aki di predica a bisa: “Algun hende ta para pa coy e edicion recien di e revistanan. Tin otro cu nunca a tende di testigonan di Jehova. Mi ta mira cu nos por yuda hopi hende cu e metodo aki.” Un otro ruman muher a comenta: “Esaki ta un manera emocionante pa predica pasobra ta e persona ta bin cerca bo, maske ta pa curiosidad.”
4. Dicon ta bon pa pone e mesa of stand di literatura na e mesun luga, y riba e mesun dia y ora?
4 Ta bon pa pone e mesa of stand na e mesun luga, y riba e mesun dia y ora. Asina, e hendenan ta custumbra di mir’e y kisas ta haya cu ta mas facil pa acerca e stand of mesa y haci pregunta of tuma literatura. Bo congregacion a organisa predicacion na luganan publico? Si ta asina, kisas abo por participa den e manera agradabel y productivo aki di “proclama e Reino di Dios tur caminda.”—Luc. 9:60.