Nos Ta Dirigi Estudionan di Bijbel na un Manera Eficaz?
1. Ki responsabilidad tur publicador cu ta dirigi estudio di Bijbel tin?
1 Ningun hende no por sirbi Dios a menos cu Jehova “hal’e cerca” dje. (Juan 6:44) Aunke esey ta berdad, nos como publicador tin e responsabilidad pa yuda hende hala cerca nan Tata celestial. (Sant. 4:8) Pero esey ta rekeri bon preparacion. Djis lesa e paragrafnan y haci e preguntanan imprimi so no ta yuda nos studiante capta e mensahe y haci progreso.
2. Kico nos lo logra si nos ta dirigi un estudio di Bijbel na un manera eficaz?
2 Pa dirigi un estudio na un manera eficaz, e publicador mester yuda e studiante (1) compronde loke Bijbel ta siña, (2) acepta esaki y (3) pon’e na practica. (Juan 3:16; 17:3; Sant. 2:26) Esaki ta un proceso cu por dura lunanan. Sinembargo, cada paso cu e persona dal, ta pone su relacion cu Jehova bira mas fuerte y su deseo pa dedica su mes na dje crece.
3. Dicon un bon maestro ta haci pregunta pa anima e studiante pa expresa su punto di bista?
3 Kico e Studiante Ta Pensa?: Pa haya sa si e studiante ta compronde y ta di acuerdo cu loke e ta siña, evita di papia di mas. En bes di haci esey, anima e studiante pa expresa su mes. (Sant. 1:19) E ta compronde loke Bijbel ta bisa tocante e topico concerni? E por splic’e cu su mes palabranan? Kico e mes ta pensa di e topico? E ta haya cu loke Bijbel ta siña ta rasonabel? (1 Tes. 2:13) E ta compronde cu e mester haci cambio den su bida? (Col. 3:10) Pa haya sa kico e studiante ta pensa, nos mester uza tacto y haci pregunta cu ta anim’e pa expresa su punto di bista, anto scuch’e cu atencion.—Mat. 16:13-16.
4. Kico nos mester haci si un studiante tin problema pa compronde of pa pone na practica algun siñansa di Bijbel?
4 Ta rekeri tempo pa stop cu custumbernan y pa cambia maneranan di pensa cu hopi biaha ta profundamente hancra. (2 Cor. 10:5) Kico nos por haci si e studiante no ta acepta of no ta pone na practica loke e ta siña? Nos mester tin pasenshi pasobra ta tuma tempo pa e Palabra di Dios y spirito santo obra den curason di e studiante. (1 Cor. 3:6, 7; Heb. 4:12) En bes di presiona e studiante, ta mihor pa laga e topico para y sigui cu e estudio. Segun cu nos ta sigui siñ’e cu amor y pasenshi, cu tempo e por sinti su mes motiva pa haci e cambionan necesario.