Loke Abo Por Haci pa Biba den e Mundo Nobo

Den e articulonan anterior, nos a mira cu Dios pronto lo caba cu tur e hendenan malbado hunto cu tur mundo su problemanan. Dicon nos por tin sigur cu esaki lo sosode? Pasobra Dios su Palabra, Bijbel, a priminti cu:

“Mundo ta pasa bay.”—1 JUAN 2:17.

Nos tin sigur cu hende lo sobrevivi pasobra e mesun texto ey ta sigui bisa:

“Esun cu ta haci e boluntad di Dios ta keda pa semper.”

Pues, si bo kier sobrevivi, bo tin cu haci Dios su boluntad. Pero, pa bo por haya sa kico Dios su boluntad ta, bo tin cu siña conoce Dios prome.

“SIÑA CONOCE” DIOS PA BO POR SOBREVIVI E FIN

Coleccion di plachi: 1. Un enfermera na hospital ta sinta riba vloer, cansa y abati. 2. Den cafetaria durante su break, e ta mira un colega feliz ta lesa un revista. 3. E colega ta lesa un texto di Bijbel p’e y ta dun’e un carchi di contacto di jw.org.

Hesus a bisa: “Pa haya bida eterno, nan tin cu siña conoce bo, e unico Dios berdadero.” (Juan 17:3) Pues, pa sobrevivi e fin y biba pa semper, bo tin cu siña conoce Dios. Esey ta nifica mucho mas cu djis acepta cu e ta existi of djis sa un par di cos tocante dje. Bo tin cu bira su amigo. Por ehempel, si bo kier bira mas cera cu un amigo di bo, lo bo haci esfuerso pa pasa mas tempo cu ne. Mescos ta conta si bo kier bira amigo cu Dios. Awor, ban wak algun berdad den Bijbel cu por yuda bo forma un amistad cu Dios y manten’e.

E Berdadnan Cu Nos Ta Siña for di Bijbel

Semper Dios tabata kier pa hende biba den un paradijs.

Dios a crea e prome hendenan, Adam cu Eva, y el a pone nan den e hofi di Eden, un luga masha bunita. Nan tabata perfecto, y Dios a duna nan tur cos cu nan tabatin mester pa nan ta feliz. Nan por a biba pa semper. Tanten cu nan a keda amigo di Dios, nan lo no a muri nunca. Pero, nan a scoge pa desobedece un simpel mandamento cu Dios a duna nan.

E motibo pakico nos ta sufri awe.

Ora e prome hende, Adam, a desobedece Dios, el a perde e chens di biba pa semper. Esey a conta pa tur su descendientenan tambe. Bijbel ta bisa: “Pa medio di un hende pica a drenta mundo, y morto pa medio di pica, y asina morto a pasa pa tur hende.” (Romanonan 5:12) Pues, Adam a pasa imperfeccion pa tur su yiunan, mescos cu mayornan por pasa defecto pa nan yiunan. Como resultado, nos tur ta bira bieu y muri.

Loke Dios a haci caba pa yuda nos.

Bijbel ta bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” (Juan 3:16) Dios a manda Hesus na Tera pa entrega su bida pa nos. Prabhakar, un homber di India di 86 aña, a bisa: “Esey ta laga mi mira cuanto Jehovaa ta stima mi. Y danki na esey, mi tin e speransa di biba pa semper.”

Con pa mustra Dios cu nos ta agradecido pa loke el a haci pa nos.

Bijbel ta bisa cu nos por mustra nos gratitud pa tur loke Dios a haci pa nos ora nos ta “cumpli cu su mandamentonan.” (1 Juan 2:3) Cu amor Jehova ta siña nos kico nos tin cu haci pa nos tin un bida feliz for di awor. (Isaias 48:17, 18) Dios no kier pa nos sufri. Pesey el a priminti cu si nos sigui su consehonan, nos lo tin un bida feliz awor y tambe e oportunidad pa biba pa semper.

LESA BIJBEL, DIOS SU PALABRA, TUR DIA

E enfermera ta wak cielo despues di lesa Bijbel den su break pafo. — Bo por sobrevivi fin di mundo si bo pidi Jehova yuda bo y si bo haci su boluntad

Pa nos por keda na bida nos tin cu come regularmente. Pero, Hesus a bisa: “Hende no mester biba di pan so, sino tambe di tur palabra cu ta sali for di boca di Jehova.”—Mateo 4:4.

Awe nos por haya Jehova su palabranan den Bijbel. Bijbel ta un buki sagrado, anto segun cu bo ta studi’e lo bo haya sa loke Dios a haci den pasado, loke e ta haciendo aworaki y loke e ta bay haci den futuro.

PIDI DIOS YUDA BO

Kico bo por haci si bo ta purba haci bo best pa obedece Dios, pero bo ta haya cu ta dificil pa stop di haci e cosnan cu e ta bisa cu ta malo? Si esey ta e caso, loke por yuda bo ta siña conoce Dios bon.

Wak e ehempel di un señora cu nos lo yama Sakura, kende tabata hiba un bida inmoral. Ora el a cuminsa studia Bijbel, el a haya sa cu Dios ta bisa pa “huy di fornicacion.” (1 Corintionan 6:18) Sakura a pidi Jehova pa dun’e forsa, anto el a logra stop di haci e cosnan cu Dios no ta gusta. Pero, te ainda e ta sigui lucha cu tentacion. El a bisa: “Ora mi cuminsa pensa riba cosnan inmoral, mi ta conta Jehova tur cos pasobra mi sa cu riba mi mes mi no por lucha contra esaki. Oracion a echt yuda mi hala mas cerca di Jehova.” Mescos cu Sakura, tin miyones di hende cu ta conociendo Dios. Anto Dios ta duna nan e forsa cu nan tin mester pa haci e cambionan den nan bida y pa biba na un manera cu ta agrad’e.—Filipensenan 4:13.

Mas mihor abo siña conoce Dios, mas mihor tambe Dios lo conoce abo y mira bo como un bon amigo. (Galationan 4:9; Salmo 25:14) Ta e ora ey lo bo por sobrevivi y drenta Dios su mundo nobo. Pero, con e mundo ey lo ta? E siguiente articulo lo splica esey.

a Bijbel ta bisa cu Dios su nomber ta Jehova.