Salud Mental Ta den un Crisis Mundial

“Tur ora mi ta sinti un tiki ansiedad, hasta ora mi ta keto sinta mi so den un camber.”

“Ora mi ta sinti mi hopi bon, mi ta bira preocupa. Mi sa di experencia cu ora mi ta sinti mi hopi contento, un djis mi ta bay sinti mi hopi tristo.”

“Mi ta purba di enfoca riba un dia alabes, pero tin biaha mi ta cuminsa preocupa riba yen di cos pareu.”

Esaki ta expresionnan di hende cu ta lucha cu problema di salud mental. Abo, of un hende cu bo ta stima, tambe a yega di sinti asina?

Bo por tin sigur cu bo no ta so. Problema di salud mental ta afecta hopi hende awe, sea ta nan mes, of un hende cu nan ta stima.

Sin duda nos ta bibando den “temponan critico, dificil pa trata cu ne”, cu ta causa tur tipo di ansiedad. (2 Timoteo 3:1) Un estudio a calcula cu rond mundo, un di cada ocho hende ta lucha cu un trastorno mental. Na aña 2020, pa motibo di e pandemia di COVID-19, e cantidad di hende cu ta sufri di ansiedad a subi cu 26 porciento, y e cantidad di hende cu ta sufri di depresion severo a subi cu 28 porciento.

Ta importante pa sa estadistica di problema di salud mental. Pero loke ta mas importante ta pa sa con abo y bo sernan keri por sinti mas mihor posibel.

Kico ta salud mental?

Ora bo tin bon salud mental, generalmente bo ta sinti bo bon y bo por funciona bon. Bo por trata cu stress normal, ta productivo na trabou y sinti bo satisfecho cu bida.

Enfermedad mental...

NO TA nifica cu e persona ta debil of zwak.
TA un problema medico cu ta causa hopi angustia y ta altera un persona su pensamento, estado emocional y comportacion.
Hopi bes por hacie dificil pa un persona tin amistad cu otro hende y pa trata cu preocupacion di tur dia.
Por afecta hende di cualkier edad, cultura, grupo etnico, tribu, religion, educacion of nivel economico.

Collage: 1. Un hoben ta mustra tristo y deprimi. 2. Un meneer ta consola su esposa deprimi. 3. Un señora ta papia cu un profesional medico.

Yudansa pa problema di salud mental

Un persona por cuminsa ripara cambionan grandi den su personalidad, den su custumber di drumimento of comemento, ta sinti angustia, ansiedad of tristeza pa tempo largo. Si esaki ta e caso, kisas e mester di yudansa di un profesional medico pa yud’e compronde kico ta causa e cambionan ey y con pa trata cu e problema. Pero unda por haya yudansa?

E homber di mas sabi cu a yega di biba, Hesucristo, a bisa: “Hende bon di salud no tin mester di dokter, ma hende malo si.” (Mateo 9:12) Hende cu ta lucha cu enfermedad mental cu haya tratamento medico apropia y remedi por reduci e cantidad di sintoma cu nan ta experencia, y nan por hiba un bida productivo y feliz. Ta sabi pa no tarda pa busca tratamento si e sintomanan ta serio of ta dura largo.a

Aunke Bijbel no ta un buki medico, e por yuda nos cu nos salud mental. Nos ta anima bo pa analisa e siguiente articulonan cu lo mustra con Bijbel por yuda nos trata cu problema di salud mental.

a E Toren di Vigilancia no ta recomenda ningun tratamento medico en particular. Cada persona mester evalua e tratamentonan medico disponibel prome cu e tuma un decision personal.