3 | Ehempel di Personahe Biblico

BIJBEL TA PAPIA DI ...Hende homber y hende muher fiel cu tabatin “e mesun sintimentonan cu nos.”—SANTIAGO 5:17.

Loke Esaki Ta Nifica

Bijbel ta yen di relato di bida real di hende homber y hende muher cu a lucha cu nan emocionnan. Segun cu nos ta lesa tocante nan, nos por haya un cu tabata sinti mescos cu nos.

Con Esaki Por Yuda

Nos tur kier pa hende compronde con nos ta sinti. Pero esaki ta mas importante ainda ora nos ta lucha cu enfermedad mental. Ora nos lesa Bijbel, nos por siña tocante personahe biblico cu a pensa y sinti mescos cu nos y nos por identifica cu nan. Como resultado, nos lo ripara cu no ta nos so tin cu lucha cu ansiedad y emocion angustioso; e ora ey, nos lo no sinti cu nos ta nos so mas.

Den Bijbel tin varios expresion di hende cu tabata den un situacion cu nan no por a cambia y cu a laga nan sinti nan desespera. Bo a yega di sinti cu ‘awor si mi echt no por mas’? Moises, Elias y David a yega di sinti asina.—Numbernan 11:14; 1 Reynan 19:4; Salmo 55:4.
Bijbel ta conta di un hende muher cu yama Ana kende “tabata kibra” pasobra e no por a haya yiu, y e otro esposa di su casa tabata ter e sin fin.—1 Samuel 1:6, 10.
Bijbel ta papia di un homber cu yama Job cu kisas nos por identifica cu ne. Aunke cu e tabatin fe fuerte den Jehova, el a yega di sinti un angustia asina grandi cu el a bisa: “Mi ta odia mi bida; mi no kier sigui biba.”—Job 7:16.

Ora nos siña con e personahenan biblico aki a trata cu pensamentonan negativo, nos tambe por haya e forsa cu nos tin mester pa trata cu nos dificultadnan.

Con Bijbel Ta Yuda Kevin

Con Trastorno Bipolar Ta Afecta Mi

“Tempo cu mi tabatin casi 50 aña, mi a ser diagnostica cu trastorno bipolar. Tin momento mi ta sinti cu mi por vence cualkier problema cu presenta den mi bida. Pero otro ora mi ta sinti cu no ta bale la pena pa sigui biba.”

Con Bijbel Ta Yuda Mi

“Un personahe di Bijbel cu mi por identifica mi mes cu ne ta Apostel Pedro. El a comete eror cu a lag’e sinti cu e no ta bal nada. Pero en bes di sigui pensa asina, Pedro a purba di ta rond di amigo cu ta interesa den dje. Riba e dianan cu mi ta sinti mi hopi malo pa motibo di mi trastorno bipolar, mi mes imperfeccionnan por bira demasiado pa mi trata cu ne y nan por pone mi sinti cu mi no ta bal nada. Mescos cu Pedro, mi a siña cu ta importante pa mi keda cerca di mi amigonan cu kier yuda mi pa mi no entrega.

Un personahe di Bijbel cu ta consola mi masha ta Rey David. Hopi bes, e tabata sintie deprimi pa motibo di e situacion cu e tabata aden, y e tabata sintie malo pa motibo di e erornan cu el a comete den pasado. Tin biaha mi por identifica mi mes cu ne pasobra mi tambe ta bisa of haci cos cu despues mi ta lamenta. E palabranan di David na Salmo 51 ta consola mi. Na versiculo 3, David a bisa: ‘Mi sa cu mi a haci malo, y mi pica ta semper mi dilanti.’ Asina mi ta sinti ora mi ta hopi deprimi, pasobra ta dificil pa mi pensa na un manera positivo tocante mi mes. Pero mi ta identifica mi mes tambe cu David su palabranan na versiculo 10: ‘O Dios, duna mi un curason puro, y cambia mi manera di pensa pa mi por keda fiel.’ Mi tambe sa roga Jehova pa yuda mi cambia e punto di bista negativo cu mi tin di mi mes. Por ultimo, versiculo 17 ta consola mi. E ta bisa: ‘O Dios, lo bo no rechasa un curason kibra y arepenti.’ E versiculo aki ta sigura mi cu Dios ta stima mi.

Ora mi enfoca riba e ehempelnan di personahe biblico y loke Dios a duna mi te cu awor, mi speransa pa futuro ta bira mas fuerte. E promesanan di Bijbel ta bira real pa mi y esey ta yuda mi persevera.”