2 | “Consuelo for di e Scritura”

BIJBEL TA BISA: “Tur loke a ser skirbi anteriormente a ser skirbi pa nos instruccion, pa asina mediante nos perseverancia y e consuelo for di e Scritura nos por tin speransa.”—ROMANONAN 15:4.

Loke Esaki Ta Nifica

Den Bijbel tin texto cu ta consola nos y cu por duna nos e forsa cu nos tin mester pa trata cu pensamentonan negativo. Ademas, Bijbel ta sigura nos cu pronto nos lo no tin cu lucha cu dolor emocional mas.

Con Esaki Por Yuda Nos

Nos tur por sinti nos tristo of ansha de bes en cuando, pero hende cu ta sufri di depresion of ansiedad por ta luchando tur dia cu dolor emocional persistente. Con Bijbel por yuda?

Bijbel por yuda nos cambia nos pensamentonan negativo pa pensamentonan positivo. (Filipensenan 4:8) E por yena nos mente cu pensamento cu ta consola nos y trankilisa nos, loke por yuda nos domina nos emocionnan.—Salmo 94:18, 19.
Bijbel por yuda nos stop di pensa cu nos no ta bal nada.—Lucas 12:6, 7.
Tin hopi relato den Bijbel cu ta sigura nos cu nos no ta nos so y cu Dios, nos Creador, ta compronde nos sintimentonan completamente.—Salmo 34:18; 1 Juan 3:19, 20.
Bijbel ta priminti cu Dios lo kita tur recuerdo doloroso. (Isaias 65:17; Revelacion 21:4) Na momentonan cu nos ta haya pensamento- y emocionnan angustioso, e promesa aki por duna nos e forsa cu nos tin mester pa persevera.

Con Bijbel Ta Yuda Jessica

Con Depresion Ta Afecta Mi

“Tempo cu mi tabatin 25 aña, mi a bira asina malo emocionalmente cu mi no por a funciona, y mi a ser diagnostica cu depresion severo. E recuerdo di cosnan doloroso cu mi a experencia den pasado tabata keda tormenta mi. Dokter a yuda mi compronde cu mi depresion tabata debi na pensamentonan negativo cu tabata bin di e cosnan doloroso cu a yega di pasa cu mi. Ademas di tuma remedi apropia, mi mester a bay terapia pa asina mi por a identifica pensamentonan negativo y siña con pa corigi nan.”

Con Bijbel Ta Yuda Mi

“Na e momentonan mas pio di mi depresion, mi tabata haya atake di panico, ansiedad severo y mi no por a drumi. Anochi, hopi bes mi tabata sinti cu mi pensamentonan negativo tabata domina mi. Manera Salmo 94:19 ta splica, Dios por consola y trankilisa nos ora ansiedad ta domina nos. Pues, mi tabatin mi Bijbel y un schrift cu texto animante banda di mi cama. Ora mi no por a drumi, mi tabata lesa algun versiculo di Bijbel pa asina Dios su pensamentonan por a consola mi.

Bijbel ta anima nos pa bringa contra pensamentonan cu ta contrario na loke nos sa di Dios. Antes mi tabata convenci cu mi no tabata bal nada, cu ningun hende no por a stima mi y cu mi no tabata sirbi pa nada. Pero mi a siña cu e tipo di pensamentonan ey ta contrario na loke Bijbel ta bisa. Pasobra Bijbel ta bisa cu Dios ta un Tata amoroso y misericordioso cu ta interesa den cada un di nos. Cu tempo, mi a siña domina mi pensamentonan en bes di laga mi pensamentonan domina mi. Mi a siña mira mi mes manera Dios ta mira mi. Esaki tabata un paso importante cu a yuda mi cambia e punto di bista negativo cu mi tabatin di mi mes.

Mi ta pura pa e tempo yega ora cu tur recuerdo doloroso di pasado y pensamentonan negativo lo disparce. Mi sa cu den futuro lo no tin trastorno mental mas. Esey ta duna mi e forsa pa trata cu mi limitacionnan awor, y ta duna mi un bunita speransa pa futuro, unda porfin mi bataya contra depresion lo yega na su fin.”