1 | Oracion “Tira Tur Boso Preocupacionnan Riba Dje”

BIJBEL TA BISA: “Tira tur boso preocupacionnan riba [Dios], pasobra e ta interesa den boso.” —1 PEDRO 5:7, mira nota.

Loke Esaki Ta Nifica

Jehova Dios ta invita nos pa papia cu ne tocante cualkier cos cu ta preocupa nos. (Salmo 55:22) Niun problema ta demasiado grandi of demasiado chikito pa haci oracion tocante dje. Si e ta importante pa nos, e ta importante pa Jehova tambe. Un paso importante pa nos haya paz mental ta pa haci oracion na Dios.—Filipensenan 4:6, 7.

Con Esaki Por Yuda

Ora nos ta lucha cu problema di salud mental, nos por sinti nos totalmente nos so. No ta semper otro hende ta compronde completamente loke nos ta pasando aden. (Proverbionan 14:10) Ora nos bisa Dios sinceramente den oracion con nos ta sinti, semper lo e scucha nos atentamente y compronde pa nos. Jehova ta mira nos, e sa kico ta nos lucha y dolornan, y e kier pa nos haci oracion na dje y bis’e kico ta preocupa nos.—2 Cronicanan 6:29, 30.

Ora nos ta papia cu Jehova den oracion, e ta fortalece nos confianza cu e ta interesa den nos. Nos por sinti mescos cu e salmista cu a bisa den oracion: “Bo ta mira mi sufrimento. Bo sa con grandi mi problemanan ta.” (Salmo 31:7) E simpel echo di sa cu Jehova ta consciente di loke nos ta pasando aden, por yuda nos hopi pa trata cu situacion dificil. Pero e no ta djis consciente di nos dificultadnan. E ta compronde mihor cu cualkier otro persona kico nos ta pasando aden, y e ta yuda nos haya consuelo y animacion for di Bijbel.

Con Bijbel Ta Yuda Julian

Con Ansiedad Ta Afecta Mi

“Mi ta lucha cu ansiedad y trastorno obsesivo-compulsivo (obsessive-compulsive disorder of OCD). Inespera mi por haya mi ta sinti ansha. Un momento mi ta sinti mi bon, y diripiente mi ta sinti mi super ansha sin ningun motibo specifico. Y loke ta haci mi mas ansha ainda ta ora mi ta rond di hende. Constantemente mi ta preocupa kico nan ta pensa di mi.

Mi amigonan cu sa tocante mi ansiedad ta haci nan best pa yuda mi. Mi tin cu admiti cu tin biaha loke nan ta bisa no ta loke mi a verwacht di tende. Pero mi ta aprecia nan esfuerso pa purba di yuda mi.

Tin biaha, mi ansiedad y OCD ta hacie dificil pa mi haci oracion. Ta tuma hopi esfuerso mental pa mi concentra y papia cu Jehova den oracion. Mi mente ta keda bay di un pensamento pa otro, y esey ta hacie hopi dificil pa mi concentra. Ora mi no por controla mi pensamentonan, ta dificil pa mi splica Jehova kico mi ta pensa y sinti.”

Con Bijbel Ta Yuda Mi

“Mi a siña for di mi estudio di Bijbel cu mi oracionnan no mester ta largo of elocuente pa Dios acepta nan. Tin biaha ora mi no por expresa con mi ta sinti, mi ta djis bisa: ‘Jehova, por fabor, yuda mi.’ Hasta na momentonan asina, mi ta sinti cu Jehova ta compronde mi y cu e ta duna mi loke mi tin mester e ora ey. Ademas di haci oracion, mi a busca tratamento medico tambe. Mi ta contento pa bisa cu danki na e dos fuentenan aki di yudansa, mi ta sinti mi hopi mihor. Aunke ta tuma hopi esfuerso pa mi haci oracion y pidi mi Tata celestial yuda mi, mi ta hacie pasobra mi ta sinti cu e ta stima mi y cu e ta yuda mi.”