Loke Ta Bon y Loke Ta Malo: Un Decision Cu Nos Tin Cu Tuma
E decision cu nos tuma relaciona cu loke ta bon y loke ta malo lo tin un influencia grandi riba nos bida; esey lo determina si nos lo tin un bida feliz of no. Jehova Dios sa esey. Pesey, e kier pa nos biba segun su normanan, esta, loke e ta bisa cu ta bon y malo.
Jehova kier pa nos disfruta di paz y felicidad.
“Ami, Jehova, ta bo Dios, kende ta siña bo pa bo mes bon, kende ta guia bo den e caminda cu bo mester cana. Mare bo por presta atencion na mi mandamentonan! E ora ey, bo paz lo bira manera un riu, y bo husticia lo bira manera e olanan constante di lama.”—Isaias 48:17, 18.
Como nos Creador, Dios sa con ta e mihor manera pa nos biba. E kier pa nos sigui su guia pasobra e sa cu esey lo beneficia nos. Ora nos sigui Dios su guia, nos no mester keda preocupa si nos decision lo duna bon resultado. Ora nos ta sigui Dios su guia, semper nos lo ta tumando e bon decision, esun cu ta hiba na paz y felicidad.
Jehova nunca no ta pidi nos pa haci algo cu nos no por haci.
“E mandamento aki cu mi ta ordena bo awe no ta mucho dificil pa bo, ni e no ta fuera di alcance.”—Deuteronomio 30:11.
Pa nos biba segun Dios su normanan, nos mester cambia nos manera di pensa y loke nos ta haci. Sinembargo, Jehova no ta exigi mucho di nos. Pasobra, como nos Creador, e sa kico nos por haci. Ademas, segun cu nos ta siña conoce Jehova, nos lo mira pa nos mes cu “su mandamentonan no ta pisa.”—1 Juan 5:3.
Jehova ta priminti cu lo e yuda hende cu ta scoge pa biba segun su normanan.
“Ami, Jehova bo Dios, ta coge bo man drechi tene; ami ta e Persona cu ta bisa bo: ‘No tene miedo. Lo mi yuda bo.’”—Isaias 41:13.
Ta posibel pa nos biba segun Dios su normanan, pasobra lo e yuda nos. E por yuda nos pa medio di su Palabra, Bijbel, cu ta duna nos animacion y speransa.
Miyones di hende rond mundo a bin realisa cu ora nan biba segun e normanan di Bijbel, nan bida a bira mihor. Dicon bo no ta tuma un poco tempo pa siña mas tocante e consehonan practico cu Bijbel ta duna? Un manera cu bo por haci esey ta di analisa e foyeto basa riba Bijbel Bo Por Disfruta di Bida pa Semper! cu ta disponibel gratis riba jw.org. Den e foyeto aki bo por haya e siguiente lesnan:
Con Bijbel Por Yuda Bo?
Bijbel Ta Priminti un Futuro Maraviyoso
Bo Por Confia Loke Bijbel Ta Bisa?
Ora bo analisa Dios su Palabra, Bijbel, lo bo realisa cu e no ta anticua, e “ta confiabel, awor y pa semper.” (Salmo 111:8) E mihor manera pa nos biba ta di sigui e normanan cu tin den Bijbel. Sinembargo, Dios no ta forsa nos pa haci esey. (Deuteronomio 30:19, 20; Josue 24:15) E ta un decision cu nos cada un tin cu tuma.