Loke Ta Bon y Loke Ta Malo: Bijbel Ta un Guia Confiabel

NOS TIN MESTER DI DIOS SU GUIA

Den Bijbel, Jehovaa Dios ta splica cu el a crea hende di tal manera cu nan tin mester di su guia; e no a crea nan pa dirigi nan mes pasonan. (Jeremias 10:23) Pesey, el a duna nos Bijbel como un guia pa nos por sa loke ta bon y loke ta malo. Dios stima hende, y e no kier pa nos tuma mal decision cu lo causa nos daño y cu lo haci nos bida dificil. (Deuteronomio 5:29; 1 Juan 4:8) Ademas, como nos Creador, e tin e sabiduria y conocemento necesario pa yuda nos compronde loke ta bon y loke ta malo. (Salmo 100:3; 104:24) Sinembargo, Dios no ta forsa niun hende pa biba segun su normanan.

Jehova a duna e prome homber y muher, Adam y Eva, tur loke nan tabatin mester pa ta feliz. (Genesis 1:​28, 29; 2:​8, 15) Ademas, el a duna nan instruccion simpel, y el a verwacht pa nan obedece e instruccionnan ey. Sinembargo, el a laga nan mes dicidi si nan lo obedece e instruccionnan ey of no. (Genesis 2:​9, 16, 17) Lamentablemente, Adam y Eva a scoge pa biba segun nan mes normanan y no segun Dios su normanan. (Genesis 3:6) Kico tabata e resultado? Awor cu hende ta dicidi pa nan mes loke ta bon y loke ta malo, nan ta mas feliz? No. A traves di añanan, nos a siña cu ora hende ignora Dios su normanan, esey no ta hiba na berdadero paz y felicidad.—Eclesiastes 8:9.

Sin importa unda nos ta biba y con nos a ser lanta, Bijbel por yuda nos tuma bon decision relaciona cu loke ta bon y loke ta malo. (2 Timoteo 3:​16, 17; wak e cuadro “Bijbel Ta un Buki pa Tur Hende.”) Ban wak con Bijbel ta haci esey.

Wak e video Ken Ta e Autor di Bijbel? riba jw.org pa haya sa dicon ta na su luga pa yama Bijbel “e palabra di Dios.”—1 Tesalonicensenan 2:13.

DEN BIJBEL NOS TA HAYA GUIA DI DIOS

Bijbel ta bisa nos con Dios a trata cu hende for di comienso. Bijbel ta yuda nos compronde Dios su punto di bista di loke ta bon y loke ta malo y di loke ta beneficia nos y loke ta causa nos daño. (Salmo 19:​7, 11) E principionan cu tin den Bijbel pa yuda nos dicidi loke ta bon y loke ta malo nunca no ta bira anticua, y nan ta yuda nos tuma bon decision den nos bida diario.

Por ehempel, wak e principio cu tin na Proverbionan 13:20: “Hende cu ta anda cu hende sabi ta bira sabi, pero hende cu tin amistad cu hende bobo lo sufri daño.” E principio aki tabata berdad den tempo di Bijbel, pero e ta berdad awe tambe. Bijbel ta yen di e tipo di principionan aki cu ta practico y valioso.—Wak e cuadro “Bijbel Ainda Ta Yuda Nos Awe.”

Pero, kisas bo ta puntra bo mes: ‘Con mi por tin sigur cu e consehonan cu Bijbel ta duna por yuda mi awe?’ Den e siguiente articulo nos lo mira algun ehempel di bida real.