Tin un Guia Confiabel Cu Por Yuda Bo Haya un Futuro Sigur?

Manera nos a mira den e articulonan anterior, hende a pone nan confianza den varios cos pa purba di haya un mihor futuro. Por ehempel, miramento di destino, educacion, rikesa y ser un bon hende. Pero si bo uza e cosnan aki pa haya un mihor futuro, ta comosifuera bo ta uza un mapa robes pa yega un caminda cu nunca bo a yega di bay prome. Esey kiermen cu no tin ningun guia confiabel cu por yuda nos haya un futuro sigur? No! Tin un guia confiabel.

GUIA FOR DI UN FUENTE SUPERIOR

Ora di tuma decision, hopi bes nos ta busca conseho cerca un persona cu ta mas grandi y mas sabi cu nos. Di mes manera, nos por haya guia confiabel pa nos futuro for di un Persona cu ta hopi mas grandi y sabi cu nos. Nos por lesa su conseho den un buki cu yama Bijbel. E prome parti di e buki aki a ser skirbi mas cu 3.500 aña pasa.

Dicon bo por confia Bijbel? Pasobra su Autor ta e Persona di mas bieu y di mas sabi den henter universo. E ta ser yama “e Anciano di Dianan” y e ta existi “for di eternidad te na eternidad.” (Daniel 7:9; Salmo 90:2) El “a crea e cielonan ... E ta e Dios, kende a forma Tera.” (Isaias 45:18) E ta bisa nos cu su nomber ta Jehova.—Revelacion 4:11.

Bijbel no ta bisa cu un cultura of nacionalidad ta mihor cu otro. Dicon no? Pasobra e Autor di Bijbel ta esun cu a crea tur hende. Su conseho semper ta practico y ta beneficia hende di tur pais. Bijbel ta e buki mas traduci y mas distribui cu cualkier otro buki.a Pues, hende tur caminda por les’e y e por ta un guia pa nan. Esey ta di acuerdo cu loke Bijbel mes ta bisa:

“Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”—ECHONAN 10:34, 35.

Mescos cu un mayor amoroso ta stima y yuda su yiunan, Jehova ta un Dios amoroso cu ta yuda nos mediante su Palabra, Bijbel. (2 Timoteo 3:16) Bo por confia su palabra, pasobra ta e a crea nos y e sa kico lo haci nos feliz.

UN GUIA CU NOS POR CONFIA

Nos por confia loke Bijbel ta bisa tocante futuro, pasobra loke Bijbel a bisa mas o menos 2.000 aña pasa tocante sucesonan mundial y comportacion di hende ta tumando luga awe.

E SUCESONAN MUNDIAL

“Nacion lo lanta contra nacion y reino contra reino, y lo tin temblor grandi, y den un luga tras di otro lo tin pest y scarsedad di cuminda.”—LUCAS 21:10, 11.

COMPORTACION DI HENDE

“Den e ultimo dianan lo bin temponan critico, dificil pa trata cu ne. Pasobra hende lo stima nan mes, stima placa; nan lo ta bromado, arogante, blasfemado, desobediente na mayornan, malagradecido, desleal, sin cariño; nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, traidor, cabesura, hincha di orguyo, cu ta stima placer en bes di stima Dios.”—2 TIMOTEO 3:1-4.

Con por ta posibel cu Bijbel a predeci exactamente loke ta tumando luga den nos tempo? Sin duda, lo bo ta di acuerdo cu loke Leung di Hong Kong a bisa: “E profecianan di Bijbel a ser skirbi hopi tempo pasa. Ta imposibel cu un ser humano por a predeci e cosnan ey cu asina tanto exactitud. Bijbel mester a bin di un persona cu ta mucho mas sabi cu nos.”

Den Bijbel, bo por haya cientos di profecia cu a cumpli caba.b Eseynan ta duna prueba cu di berdad Bijbel ta Palabra di Dios. Jehova ta bisa: “Ami ta Dios, y no tin ningun manera mi, kende ta declara e fin for di principio.” (Isaias 46:9, 10) Pesey, bo tin bon motibo pa confia loke Bijbel ta bisa tocante futuro.

GUIA CU TA BENEFICIA BO AWOR Y PA SEMPER

Ora bo sigui e guia cu tin den e Santo Scritura, lo bo haya beneficio. Laga nos wak algun ehempel.

BON CONSEHO TOCANTE PLACA Y TRABOU

“Un man yen di sosiego ta mihor cu dos mokete yen di trabou y coremento tras di biento.”—ECLESIASTES 4:6.

UN BIDA DI FAMIA FELIZ

“Laga cada un di boso stima su esposa manera e ta stima su mes; di otro banda, e esposa mester tin respet profundo pa su esposo.”—EFESIONAN 5:33.

BON RELACION CU OTRO HENDE

“Stop di rabia y laga furia para; no cunsumi—esey ta conduci na maldad so.”—SALMO 37:8.

Si bo haci loke Bijbel ta bisa, lo bo tin un bon bida awor y un futuro sigur. Den Bijbel, nos por haya sa tocante Dios su promesanan maraviyoso pa futuro. Algun di e promesanan ey ta:

PAZ Y SIGURIDAD

“[Nan] lo deleita nan mes den paz abundante.”—SALMO 37:11.

CAS Y CUMINDA PA TUR HENDE

“Nan lo traha cas y biba den nan; tambe nan lo planta cunucunan di wendruif y come nan fruta.”—ISAIAS 65:21.

NO TIN MALEZA NI MORTO MAS

“Lo no tin morto mas; ni tristeza ni sclamacion ni dolor lo no tin mas.”—REVELACION 21:4.

Kico bo mester haci pa haya un futuro asina? Wak e siguiente articulo pa haya sa e contesta.

a Pa mas informacion tocante traduccion y distribucion di Bijbel, bay na www.jw.org y busca bou di LOKE BIJBEL TA SIÑA > BIJBEL & HISTORIA.

b Pa mas informacion, wak capitulo 9 di e buki E Bijbel—e Palabra di Dios of e palabra di hende? publica pa Testigonan di Jehova. E ta disponibel online riba www.jw.org/pap. Bay na BIBLIOTHEKA > BUKI I FOYETO.