Con Guera y Conflicto Arma Lo Caba?

DIOS LO CABA CU GOBIERNO HUMANO

Dios lo caba cu gobierno humano na e guera cu Bijbel ta yama Armagedon.a (Revelacion 16:16) Na e tempo ey, “e reynan di henter e Tera habita” lo reuni hunto pa “e guera cu lo tuma luga riba e gran dia di Dios, e Todopoderoso.” (Revelacion 16:14) Despues di Armagedon, lo no tin guera nunca mas na mundo.

Dios lo reemplasa gobierno humano cu su Reino, of gobierno, y e lo goberna for di cielo. Dios su gobierno nunca lo ser destrui. (Daniel 2:44) Dios a scoge su Yiu, Hesucristo, pa ta Rey di e gobierno ey. (Isaias 9:​6, 7; Mateo 28:18) Ta e gobierno ey ta e Reinob cu Hesus a siña su siguidornan pa pidi p’e den oracion. (Mateo 6:​9, 10) Tur hende lo biba bou di un solo gobierno, y nan lo tin Hesus como nan Gobernante.

Contrario na gobernante humano, Hesus lo no uza su poder y autoridad pa su propio interes. Hesus ta husto y imparcial. Pesey, niun hende lo no mester preocupa cu nan lo ser neglisha of trata inhustamente debi na nan rasa, nacionalidad of cultura. (Isaias 11:​3, 4) Tampoco hende lo no tin mester di bringa pa nan derechonan. Dicon no? Pasobra Hesus lo percura pa tur hende por biba bon. Bijbel ta bisa: “Lo e libra hende pober cu ta sclama pa yudansa; lo e libra hende oprimi y hende cu no tin niun persona pa yuda nan ... Lo e libra nan for di opresion y violencia.”—Salmo 72:​12-14.

E Reino di Dios lo elimina tur arma na mundo. (Mikeas 4:3) Ademas, lo e caba cu hende malbado cu no kier stop di bringa y hende cu ta haci daño na otro hende. (Salmo 37:​9, 10) Tur caminda na mundo, hende homber, hende muher y mucha lo sinti nan trankil y proteha.—Ezekiel 34:28.

Bou di Dios su gobierno, tur hende lo disfruta di un mihor bida. Dios su gobernacion lo caba cu tur problema cu ta causa guera, manera pobreza, hamber y falta di luga di biba. Tur hende lo haya abundancia di cuminda nutritivo y nan lo tin un bon luga pa biba.—Salmo 72:16; Isaias 65:​21-23.

E Reino di Dios lo drecha tur e dañonan cu guera a causa. Lo e no drecha daño fisico so, pero tambe cualkier problema mental of daño emocional cu un persona tin debi na e cosnan horibel cu el a experencia durante guera. Hasta hende cu a perde nan bida lo ser resucita aki riba Tera. (Isaias 25:8; 26:19; 35:​5, 6) Famia lo topa otro atrobe, y nan lo no corda mes mas riba tur e cosnan malo di pasado, pasobra “e cosnan cu tabata pasa antes no t’ey mas.”—Revelacion 21:4.

DIOS LO ELIMINA PICA

Bou di e Reino di Dios, tur hende lo adora e unico Dios berdadero, Jehova.c E ta “e Dios di amor y di paz.” (2 Corintionan 13:11) Hende lo siña con pa biba na paz cu otro. (Isaias 2:​3, 4; 11:9) Tur hende cu aplica loke nan siña lo bira perfecto, y nan lo no sinti e efectonan di pica mas.—Romanonan 8:​20, 21.

DIOS LO CABA CU SATANAS Y E DEMOÑONAN

Dios lo caba cu Satanas y e demoñonan, kendenan ta influencia hende pa bringa contra otro. (Revelacion 20:​1-3, 10) Sin e mal influencia di Satanas y e demoñonan, “lo tin paz tur caminda.”—Salmo 72:7.

Bo por tin sigur cu loke Dios a priminti, esta, cu lo e caba cu guera y violencia, lo bira realidad. Dios tin tanto e deseo como e poder pa caba cu guera.

• Dios ta sabi y e tin poder. Pesey, e sa con pa caba cu guera y violencia. (Job 9:4) Nada no ta imposibel pa Dios.—Job 42:2.

• Dios no ta gusta mira hende sufri. (Isaias 63:9) Ademas, e ta “odia tur hende cu ta stima violencia.”—Salmo 11:5.

• Dios semper ta cumpli cu loke e priminti; e no por gaña.—Isaias 55:​10, 11; Tito 1:2.