Crisis di Refugiado—Miyones di Hende Ta Huy for di Ucrania

Dia 24 di februari 2022, ehercito militar di Rusia a invadi Ucrania. Como cu e habitantenan di Ucrania a haya nan ta huy pa e guera, esey a crea un crisis humanitario.a

Nataliia, kende tabata biba na e stad Kharkiv na Ucrania, a conta: “Bom tabata cay tur caminda y tabatin hopi explosion. Bo no por imagina cuanto miedo nos tabatin. Ora nos a tende cu tabatin trein pa evacua hende, nos a dicidi di bay di biaha. Nos tabatin mag di bay cu un tas pa persona. Imagina bo, bo mester pone tur loke ta importante pa bo den un solo tas. Al final, nos por a bay cu solamente documento importante, remedi, awa y algun coy come. Tur otro cos a keda atras. Segun cu bom tabata cay, nos a bay stacion di trein.”

Nadija, kende tabata biba na e stad Kharkiv, a conta: “Te na ultimo, nos a pensa cu lo no a bin guera. Mi tabata tende con explosion tabata tuma luga na otro parti di stad, y tur bentana tabata sacudi. Mi a dicidi di huy, y m’a bay cu solamente loke tabata necesario. M’a sali for di cas 8 or di mainta y coy trein bay Lviv, y despues mi a coy bus bay Polonia.”

E articulo aki lo contesta e siguiente preguntanan:

• Kico realmente ta algun causa di e crisis aki di refugiado?

• Ki speransa tin pa refugiado?

• Bijbel por yuda refugiado?

Kico realmente ta algun causa di e crisis aki di refugiado?

E crisis aki di refugiado na Ucrania a cuminsa pasobra Rusia a invadi Ucrania. Pero Bijbel ta mustra cu tin algun otro causa mas pa esey:

• E gobiernonan di e mundo aki no a logra percura pa e necesidadnan di hende riba Tera. Mas bien, hende den puesto di autoridad hopi biaha ta uza nan poder pa oprimi otro hende.—Eclesiastes 4:1; 8:9.

• Satanas, e Diabel, ta “e gobernante di mundo.” E tin asina tanto mal influencia riba humanidad cu Bijbel ta bisa cu “henter mundo ta den poder di e Malbado.”—Juan 14:30; 1 Juan 5:19.

• Pa hopi siglo, humanidad a enfrenta tur sorto di problema. Pero awor, nos ta bibando den un tempo cu Bijbel a papia di dje di antemano. Na 2 Timoteo 3:1, Bijbel ta bisa cu “den e ultimo dianan lo bin temponan critico, dificil pa trata cu ne.” Ademas, Bijbel a bisa cu e cosnan cu mas nos lo mira den e ultimo dianan aki ta guera, desaster natural, scarsedad di cuminda y epidemia. Tur e sucesonan ey ta pone hende huy for di nan pais.—Lucas 21:10, 11.

Ki speransa tin pa refugiado?

Bijbel ta mustra cu nos Creador, Jehova,b ta un Dios cu tin amor y compasion pa refugiado y pa hende cu ta haya nan obliga ta bandona nan cas. (Deuteronomio 10:18) Dios ta priminti di soluciona e problema di refugiado mediante un gobierno den cielo. Bijbel ta yama e gobierno aki e Reino di Dios, y lo e reemplasa tur gobierno riba Tera. (Daniel 2:44; Mateo 6:10) Jehova lo uza su Reino pa destrui Satanas e Diabel. (Romanonan 16:20) E Reino ey lo goberna henter mundo, y asina lo e caba cu e fronteranan nacional cu ta causa division. Henter humanidad lo bira un famia uni. Nunca mas hende lo tin cu huy for di nan cas, pasobra Bijbel ta priminti: “Cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR [Jehova] di ehercitonan a papia.”—Mikeas 4:4.

Ta e Reino di Dios so por trece un solucion permanente pa e crisis di refugiado cu nos tin awe. Jehova lo uza su Reino pa caba cu e problemanan cu ta obliga hende di bira refugiado. Wak algun ehempel:

• Guera. “[Jehova] ta haci gueranan stop.” (Salmo 46:9) Pa haya sa con Dios lo caba cu tur guera, lesa e articulo “Kico Lo Trece Paz na Mundo?”

• Opresion y violencia. “[Jehova] lo rescata nan bida for di opresion y violencia.” (Salmo 72:14) Lesa e serie di articulo titula: “Nos Por Vence Odio!” E articulo ey ta splica con hende por cambia nan mal actitud maske esey por parce dificil.

• Pobreza. “[Jehova] lo libra esun den necesidad ora cu e sclama pa yudansa.” (Salmo 72:12) Lesa e articulo “¿Es realista esperar un sistema económico justo?”, y wak con Dios lo caba cu e causanan principal di pobreza.

• Scarsedad di cuminda. “Lo tin abundancia di maishi den e Tera.” (Salmo 72:16) Lesa e articulo “¿Un mundo sin hambre?”, y wak con Dios lo percura pa niun hende no tin cu pasa hamber mas.

Bijbel por yuda refugiado?

Si! Bijbel ta duna refugiado un speransa pa futuro, y e por yuda nan trata cu e dificultadnan cu nan ta enfrenta aworaki.

Bijbel ta bisa: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente.”—Filipensenan 4:6, 7.

Loke esaki ta encera: Pidi Dios duna bo paz mental y un curason trankil den cualkier circunstancia cu bo haya bo aden. Lesa e articulo “Filipenses 4:6, 7—‘No se inquieten por nada.’”