SIGUI VIGILA!

Rond Mundo Tin Aumento di Violencia cu Arma di Candela—Kico Bijbel Ta Bisa?

INFORMACION ACTUALISA: 27 di april 2023

Arma di candela ta sigui ta e causa di morto di hopi hende rond mundo. Aki ta sigui algun suceso cu a tuma luga recientemente:

“Merca ta birando e pais cu mas caso di tiroteo den cua hopi hende ta perde nan bida. Tin mas o menos un caso pa siman.”—21 di april 2023, e corant The Guardian.
“Durante un tiroteo na un cas na Surafrica, dies miembro di un famia a ser mata. Entre e personanan cu a muri, tabatin shete hende muher y un mucha homber di 13 aña di edad.”—21 di april 2023, AP News.
“Na Hamburg, Alemania, na un luga caminda testigonan di Jehova ta reuni, un homber a tira 6 persona mata. Despues, el a tira su mes mata.”—10 di maart 2023, Reuters.

Bijbel ta duna consuelo na hende cu ta sufri pa motibo di suceso tragico manera esnan menciona ariba. Pa mira un caso real, wak e video DeJanerio Brown: Tumbá Pero No Kompletamente Destruí.

Bijbel ta yuda nos compronde dicon suceso tragico ta tuma luga. Pa mas informacion, wak e video Dikon Dios Ta Permití Sufrimentu?

Durante luna di juli 2022, rond mundo tabatin varios caso di violencia cu arma di candela cu a laga hende den shock:

“Un homber a mata un di e politiconan mas conoci di Japon [Ex-Prome Minister Shinzo Abe]. Esey a laga e pais y hopi hende rond mundo den shock. E suceso tabata specialmente sorprendente como cu no tin hopi crimen violento na e pais, y nan tin ley hopi estricto relaciona cu posesion di arma di candela.”—10 di juli 2022, e corant The Japan Times.
“Dinamarca ta den shock! Un homber a tira tres hende mata den un centro comercial na Kopenhagen.”—4 juli 2022, Reuters.
“Sur Africa: 15 hende a muri despues cu un homber a basha bala riba hende den un bar na Soweto.”—10 di juli 2022, e corant The Guardian.
“Mas cu 220 hende a muri debi na violencia cu arma di candela na Merca durante e weekend di celebracion di 4 di juli.”—5 di juli 2022, CBS News.

Tin speransa cu e actonan di violencia ey lo caba un dia? Kico Bijbel ta bisa?

Violencia Lo Caba

Bijbel ta describi e tempo cu nos ta biba aden como “e ultimo dianan.” Bijbel ta bisa cu e tempo aki hende lo actua na un manera feroz y cruel. (2 Timoteo 3:1, 3) Hopi hende ta biba cu miedo pa motibo di e manera violento cu hende ta actua. (Lucas 21:11) Sinembargo, Bijbel ta priminti cu den futuro lo no tin violencia mas. Bijbel ta bisa tambe cu hende “lo biba den un luga caminda paz ta reina, den cas sigur y caminda tin trankilidad y sosiego.” (Isaias 32:18) Con violencia lo yega na su fin?

Dios lo kita hende malbado for di riba Tera y caba cu tur arma.

“Pa loke ta hende malbado, nan lo ser elimina for di riba Tera.”—Proverbionan 2:22.
“[Dios] ta caba cu guera tur caminda riba Tera. E ta kibra boog y kibra speer na werki. E ta kima garoshi di guera den candela.”—Salmo 46:9.

Dios lo kita e causa principal di violencia; e lo siña hende pa biba na paz cu otro.

“Nan lo no causa daño ni destruccion riba henter mi sero santo, pasobra mescos cu lama ta yen di awa, asina tambe Tera sigur lo ta yen di hende cu conoce Jehova.”—Isaias 11:9.
Ya caba Dios ta siñando hende rond mundo pa nan no ta violento y pa nan no uza arma. Si, e ta siñando hende pa bati nan spadanan traha ploeg cu nan, y bati nan lansanan pa traha sker pa snoei cu nan.—Mikeas 4:3.

Pa haya sa mas di e promesa di Bijbel tocante un mundo sin miedo, lesa e articulo: “Ta Posibel pa Biba sin Miedo?”

Pa haya sa mas tocante e solucion permanente pa violencia, lesa e articulo: “Porfin Tin Paz Riba Tera!”