E Punto di Bista Biblico

Kico Dios Ta Pensa di Violencia?

T IN violencia tur caminda y e ta manifesta su mes den varios manera. Ademas di violencia den guera, tin violencia relaciona cu droga y gang, violencia den deporte, na scol, trabou y tambe den entretenimento. Asta violencia na cas ta parce un cos normal den hopi famia. Por ehempel, un estudio cu a wordo haci resientemente a indica cu na Canada alrededor di 1,2 miyon homber y mohe a wordo ataca di un manera violento door di nan partner por lo menos un bes durante un periodo resien di cinco aña. Un otro estudio a yega na e conclusion cu alrededor di 50 porshento di hombernan cu ta maltrata nan casa, ta maltrata nan yiunan tambe.

Siguramente, tal actonan di violencia ta shock abo tambe, mescos cu mayoria di otro hende. Sinembargo, violencia a bira un parti importante den mayoria entretenimento di awendia. No ta solamente peliculanan di violencia ireal ta atrae hende, sino tambe violencia di bida real cu nan ta pasa na television. Boxeo y otro deportenan violento ta masha gusta den hopi pais. Pero kico Dios ta pensa di violencia?

Un Historia Largo di Violencia

Violencia tin un historia largo. E prome acto di violencia fisico cu un ser humano a comete ta registra y describi den Bijbel na Genesis 4:2-15. Cain e prome yiu di Adam cu Eva, a bira yalurs riba su ruman Abel y a mata su ruman cu sanger friu. Con Dios a reacciona? Bijbel ta splica cu Yehova Dios a castiga Cain severamente pa e echo cu el a mata su ruman.

Na Genesis 6:11, nos ta lesa cu mas cu 1.500 aña despues di e incidente ei, e tera tawata “yen di violencia.” Kico tawata Dios su reaccion atrobe? El a duna husto Noe e mandato pa traha un arca cu lo a proteha e cu su famia durante e dilubio cu Yehova a trece riba tera, pues ‘destruyendo tur carni’ di e sosiedad violento ei. (Genesis 6:12-14, 17) Pero ta kico a pone cu hende tawata asina inclina na violencia?

Influensia di Demoño

E relato di Genesis ta revela cu algun di e yiunan di Dios of angelnan cu a bira rebelde, a tuma curpa humano y a casa cu hende mohe, anto a produci desendencia. (Genesis 6:1-4) E desendencia, cu tawata conoci como nefilim, tawata hombernan gigante y di fama. Bou di influencia di nan tatanan demoño, nan a bira tiranonan violento. Ora e awa di dilubio a subi y a cubri tera, e tiranonan malbado aki a muri. Pero e demoñonan aparentemente a desmaterialisa y a bolbe na e region di spirito.

Bijbel ta mustra bon cla cu desde e tempo ei, e angelnan rebelde aki a influencia hende masha hopi mes. (Efesionan 6:12) Nan lider, Satanas, ta wordo yama e “matado” for di principio. (Huan 8:44) Pues, apropiadamente nos por yama e violencia cu ta tuma luga aki riba tera, algo demoniaco of satanico.

Bijbel ta duna spiertamento contra e poder seductivo cu violencia tin. Na Proverbionan 16:29, e ta bisa: “Un hende violento ta tenta su prohimo, y ta hib’e den un caminda cu no ta bon.” Hopi hende awe a wordo seduci pa aproba, promove of comete actonan di violencia. Tambe, miyones di hende a wordo tenta pa disfruta di entretenimento cu ta glorifica violencia. Loke Salmo 73:6 ta bisa, ta e manera corecto pa describi e generacion djawe. E salmista ta bisa: “Orguyo ta nan coyar; violencia ta tapa nan manera un bisti.”

Dios Ta Odia Violencia

Con cristiannan mester comporta nan mes den un mundo violento? E relato biblico encuanto e yiunan di Yacob, esta Simeon y Levi, ta duna nos guia sano. Nan ruman mohe Dina tawatin amistad cu e hendenan inmoral di Sikem. Esaki a pone cu un persona di Sikem a viol’e. Simeon y Levi a tuma vengansa y sin misericordia nan a mata tur e hombernan di Sikem. Mas despues, bou di inspiracion dibino Yacob a maldiciona e rabia descontrola di su yiunan bisando lo siguiente: “Simeon y Levi ta ruman; nan armanan ta instrumento di violencia. No laga mi alma tin parti den nan conseho; no laga mi gloria uni cu nan asamblea.”—Genesis 49:5, 6.

Na harmonia cu e palabranan aki, cristiannan ta evita di asocia cu esnan cu ta promove of comete actonan di violencia. Sin duda, Dios ta odia esnan cu ta promove violencia. Bijbel ta bisa: “SEÑOR ta pone e husto y e malbado na prueba, ma esun cu ta gusta violencia su alma ta odia.” (Salmo 11:5) Cristiannan ta wordo spierta pa evita tur forma di rabia descontrola, asta violencia verbal.—Galationan 5:19-21; Efesionan 4:31.

Violencia Lo Caba un Dia?

E profeta di antes, Habacuk, a puntra Yehova Dios: “Pa cuanto tempo lo mi sclama na bo pa ausilio contra violencia?” (Habacuk 1:2, NW) Kisas bo a yega di haci un pregunta similar. Dios a contesta Habacuk y a primintie cu lo e kita “e malbado.” (Habacuk 3:13) E buki profetico di Isaias tambe ta duna speransa. Einan Dios ta priminti: “Violencia lo no wordo tendi mas den bo tera, ni ruina ni destruccion paden di bo fronteranan.”—Isaias 60:18.

Testigonan di Yehova tin confiansa cu pronto Dios lo kita for di riba tera tur forma di violencia y esnan cu ta promove. Na e tempo ei, en bes di wordo yena cu violencia, “tera lo wordo yena cu conocemento di e gloria di SEÑOR, manera e awanan ta tapa lama.”—Habacuk 2:14.

[Plachi na pagina 16]

Violencia a cuminsa ora Cain a mata Abel