Dicon Tin Asina Tanto Crimen Violento Awe?
TUR crimen ta malo. Pero crimennan sin sentido ta mas dificil pa compronde. E echo cu hopi bes no tin un motibo cla pakico hende ta comete nan, ta confundi investigadonan. Den ultimo añanan medionan di comunicacion a bira hopi mas eficas, y esei ta pone cu miyones of asta miles di miyones di hende ta haya sa di e crimennan spantoso ei denter di algun ora. Un raport publica door di Organisacion Mundial di Salu ta declara cu “violencia ta afecta tur continente, tur pais y mayoria comunidad.”
Asta luganan cu tawata ser considera relativamente safe den pasado, a mira mas caso di actonan di violencia sin sentido den ultimo tempo. Por ehempel, pa hopi tempo Hapon tawatin un porsentahe abou di crimen violento. Sinembargo, na e stad Ikeda, na juni 2001, un homber a cana drenta den un scol cu un cuchiu grandi y a cuminsa hinca y corta e muchanan pa loco. Den 15 minuut el a mata 8 mucha y a herida 15. Si agrega esaki na otro informenan for di Hapon, manera esun di hobennan cu ta mata hende totalmente desconoci djis pa nan sinti un kick, anto bo ta realisa mesora cu cos a cambia einan.
Asta den paisnan caminda semper tawatin hopi criminalidad, cierto actonan sin sentido a repugna e publico en general. Esaki tawata e caso despues di e atentado di 11 di september 2001 contra World Trade Center na New York. Psicologo Gerard Bailes a comenta lo siguiente: “Esaki ta comberti mundo den un luga totalmente desconoci y peligroso den cua nos no por predeci kico ta bai pasa.”
Dicon Nan Ta Hacie?
No tin un solo factor cu ta splica tur e varios casonan di violencia sin sentido. Loke ta haci algun crimen mas dificil pa compronde ta e echo cu nan no ta logico. Por ehempel, ta dificil pa compronde pakico un persona lo cana bai riba hende totalmente desconoci p’e y hinca nan mata, of pakico un hende lo pasa cu auto banda di un cas y cuminsa tira pa loco.
Tin hende ta pretende cu violencia ta algo natural den hende. Na otro banda, otronan ta argumenta cu bo no por bisa cu crimennan sin sentido ta un parti inevitabel di naturalesa humano.—Wak e cuadro “Destina na Violencia?”
Hopi experto ta kere cu tin un cantidad di factor y circunstancia cu ta funciona como catalisator cu ta pone hende comete actonan violento sin sentido. Un raport publica door di Academia di FBI (Federal Bureau of Investigation) na Merca ta bai asina leu di bisa: “Asesinato no ta un acto di un hende na tino y cu mente sano.” Algun autoridad lo no ta di acuerdo cu e palabranan di e declaracion ei. No obstante, hopi di nan ta di acuerdo si cu loke e ta sugeri. Pa un of otro motibo e manera di pensa di esnan cu ta comete crimen sin sentido no ta normal. Algo a afecta nan manera di rasona te na e punto cu nan ta haci lo inimaginabel. Cua ta e factornan cu ta motiva hende pa haci e cosnan ei? Laga nos considera varios posibilidad cu expertonan a menciona.
Bida di Famia Kibra
Spierta! a puntra Marianito Panganiban, un bosero di e Departamento Nacional di Investigacion na Filipinas, kico ta e background di esnan cu ta comete crimennan extremo. El a bisa: “Nan ta bini di famianan kibra. Nan falta cuido y amor. Hende su caracter moral ta bayendo atras debi cu nan no ta haya guia, anto asina nan ta bai den mal caminda.” Hopi investigado ta indica cu ta comun pa criminalnan agresivo bini di famianan den cua miembronan no tin un bon relacion cu otro y di famianan cu tin un historia di violencia den famia.
E Centro Nacional Mericano pa Analisis di Crimen Violento a saca un raport cu a menciona e factornan cu lo por a identifica hobennan cu kisas lo comete violencia mortal na scol. E raport a menciona entre otro e siguiente factornan cu tin di aber cu bida di famia: un relacion turbulento entre mayor y yiu, mayornan cu no por reconoce problema den nan yiunan, un falta di intimidad, mayornan cu ta pone masha tiki limite of ningun limite mes pa e mucha su comportacion, y muchanan cu ta extremadamente sera den nan mes, hibando un bida dobel y ta sconde un parti di nan bida for di nan mayornan.
Awe hopi mucha ta victima di famia cu ta habri for di otro. Otronan tin mayornan cu tin masha tiki tempo pa nan. Miles di hoben a lanta sin haya e debido guia moral of guia di nan famia. Tin experto ta di opinion cu un ambiente asina ta stroba muchanan desaroya e capasidad di por sera un banchi emocional cu otro hende, y pesei ta bira mas facil pa nan comete crimen contra nan prohimo, y hopi bes sin sinti remordimento.
Gruponan Motiva pa Odio y Cultonan
Evidencia ta indica cu algun culto of grupo extremista motiva pa odio tawatin un gran influencia riba cierto crimennan cu a ser cometi. Na Indiana, Merca, un mucha homber colo scur di 19 aña tawata cana bai cas despues di a sali di un centro comercial. Un rato despues, e tawata morto benta abou riba acera cu un bala den su cabes. Un mucha homber jong—cu a scoh’e pa casualidad—a tir’e mata. Dicon? Di e manera ei e asesino supuestamente kier a cualifica pa e bira miembro di un organisacion rasista cu ta kere den superioridad di hende blanco, y pa e por a haya un tatuahe forma di cas di haraña pasobra el a mata un persona colo scur.
E atentado na 1995 cu gas di nervio den un metro di Tokio; e suicidio masal na Jonestown, Guyana; y e mortonan na Suisa, Canada y Francia di 69 miembro di e Orden dje Tempel Solar, tur a tuma luga pasobra hende a ser influencia door di un culto. E ehempelnan aki ta ilustra e influencia poderoso cu cierto gruponan tawatin riba e manera di pensa di algun hende. Lidernan cu tin carisma a logra pone hende haci cosnan “inimaginabel” door di atrae nan cu un of otro supuesto beneficio.
Medionan di Comunicacion y Violencia
Tin hende ta mustra riba pruebanan cu ta indica cu varios medio di comunicacion moderno por ta stimula comportacion agresivo. Nan ta bisa cu ora hende regularmente ta wak violencia na television, den pelicula, den video game y riba Internet, esei ta pone nan consenshi perde heful y ta inspira nan pa comete crimennan violento. Dr. Daniel Borenstein, presidente di e Asociacion Psikiatrico Mericano, a declara: “Na e momento aki tin mas cu 1.000 estudio basa riba mas cu 30 aña di investigacion cu ta demostra un relacion basa riba causa y efecto entre violencia den medionan di comunicacion y comportacion agresivo serca algun mucha.” Dilanti di un comision di Senado Mericano, Dr. Borenstein a testifica: “Nos ta combenci cu wakmento regular di violencia den tur forma di entretenimento tin implicacionnan serio pa salubridad publico.”—Wak e cuadro “Un Docter Su Opinion di Violencia den Wega di Computer.”
Hopi bes expertonan ta cita casonan spesifico pa mustra cu esaki ta berdad. Den caso di e pistolero envolvi den e asesinato cu sanger friu di un pareha cu tawata wak solo sali canto di lama (menciona den e articulo anterior), fiscal a presenta prueba cu e asesinato pa kick a ser inspira door di un pelicula violento cu e pistolero a wak bes tras bes. Relaciona cu un tiroteo na scol caminda 15 hende a ser mata, nan ta bisa cu e dos studiantenan cu a comete e crimen tawata pasa hopi ora tur dia ta hunga video game violento. Ademas, regularmente nan tawata wak peliculanan cu tawata glorifica violencia y matamento.
Droga
Na Merca, e porsentahe di asesinato cometi door di teenager a bira triple durante un periodo di ocho aña. Kico autoridadnan ta señala como un factor? Gangnan, specialmente gangnan envolvi cu crack di cocaina. Di mas cu 500 asesinato resien na Los Angeles, California, “polis ta bisa cu 75 porshento tawata conecta cu gang.”
Un raport publica door di Academia di FBI ta declara lo siguiente: “Den un cantidad enorme di casonan di asesinato tin droga envolvi.” Algun hende kende nan mente ta bruha debi na uzo di droga, ta mata bou di influencia di droga. Otronan ta defende nan traficacion di droga door di uza violencia. Pues ta bisto cu droga ta un factor poderoso cu ta influencia hende pa comete actonan horibel.
Acceso Facil na Armanan Destructivo
Manera a ser menciona den e articulo anterior, un solo pistolero na Tasmania, Australia, a mata 35 persona y herida 19. E homber tawata arma cu scopetnan semiautomatico estilo militar. Esaki a pone hopi hende conclui cu acceso facil na e tipo di armanan ei ta un otro factor den e aumento di crimen violento.
Un informe ta mustra cu na 1995 tawatin solamente 32 asesinato uzando arma di candela na Hapon, y mayoria tawata trata di gangster cu a mata otro. Na contraste, Merca tawatin mas cu 15.000 asesinato cu arma di candela. Dicon e diferencia? Tin hende ta menciona e leinan stricto cu Hapon tin relaciona cu pocesion di arma como un motibo.
Hende Su Inhabilidad di Trata cu Bida y Problema
Ora nan tende di cierto actonan horendo, tin hende kisas ta reacciona bisando: ‘E persona ei mester ta loco!’ Sinembargo, no ta tur persona cu ta comete e tipo di crimennan ei ta mentalmente perturba. Pero hopi di nan si tin dificultad pa trata cu situacionnan di bida. Expertonan ta señala na cierto defectonan di personalidad cu lo por hiba na actonan extremo. Entre nan tin lo siguiente: falta di capasidad di siña y dificultad pa anda cu otro hende; efectonan negativo di abuso fisico of sexual; caracteristicanan antisocial; odio pa un cierto grupo, manera pa hende mohe; falta di remordimento ora di haci malo; y un deseo pa manipula otro hende.
Sea cual sea ta nan problema, tin hende ta bira asina absorba door di nan dificultad cu nan manera di pensa ta cambia, y esaki por pone cu nan ta comete actonan straño. Un ehempel ta un verpleegster cu tawata desea atencion pero di un manera abnormal. E tawata pasa muchanan chikito un hangua pa relaha musculo y esaki tawata pone nan stop di hala rosea. Caba e verpleegster tawata gosa di e atencion cu e ta haya ora e “salba” cada un di e muchanan. Desafortunadamente, no ta tur e por a laga hala rosea atrobe. El a ser sentencia pa asesinato.
For di lo anterior ta bisto cu ta un combinacion di factor ta influencia hende pa comete crimen violento. Sinembargo, nos lista lo no ta completo si nos no considera un factor mas cu ta masha importante.
E Contesta di Bijbel
Bijbel ta yuda nos compronde kico ta pasando awor y dicon hende ta actua den maneranan extremo asina. E ta describi actitudnan cu nos ta mira tur ora. Por ehempel, e lista cu nos ta haya na 2 Timoteo 3:3 y 4 ta bisa cu hende lo ta “sin amor” y cu nan lo ta “sin dominio propio, grosero, odiado di loke ta bon” y “imprudente.” Den un otro buki di Bijbel, Hesus a bisa: “Amor di hopi hende lo fria.”—Mateo 24:12.
Bijbel ta bisa: “Den e ultimo dianan temponan trabahoso lo bin.” (2 Timoteo 3:1) Si, loke nos ta mira ta prueba cu nos ta bibando na fin di e actual sistema di cosnan. E situacion di mundo hunto cu e actitudnan di hende ta bayendo atras. Nos por spera un solucion inmediato? Bijbel ta contesta: “Hendenan malbado y gañadonan lo bai di malo pa piyo, gañando y siendo gaña.”—2 Timoteo 3:13.
Esaki ta nifica cu humanidad ta destina na un ciclo continuo di violencia cruel y criminalidad creciente? Laga nos analisa e pregunta ei den nos siguiente articulo.
[Cuadro na pagina 6]
Destina Na Violencia?
Tin experto ta argumenta cu semper hende tawatin e inclinacion pa comete violencia of mata. Esnan cu ta kere den evolucion ta di opinion cu nos a bini di bestia salbahe y cu nos simplemente a hereda nan caracteristicanan violento. E tipo di teorianan ei ta indica cu nos ta destina na un ciclo continuo di violencia for di cua nos no tin speransa di scapa.
Sinembargo, tin hopi prueba cu ta mustra lo contrario. E teorianan menciona ariba no ta splica dicon den diferente cultura e frecuencia y tipo di violencia cu hende ta comete ta varia masha hopi mes. Nan no ta indica dicon den algun cultura ta parce cu ta normal pa hende reacciona cu violencia, mientras cu den otro sosiedadnan tin masha tiki violencia, y casi ningun asesinato. Psicoanalista Erich Fromm a señala algun fayo den e teoria di cu nos a hereda agresividad for di macaco door di mustra cu aunke algun macaco ta violento debi na cierto necesidadnan fisico of pa proteha nan mes, hende ta e unico criatura cu e conoce cu ta mata djis pa puro placer of pa kick.
Den nan buki The Will to Kill—Making Sense of Senseless Murder (E Deseo di Mata—Buscando Sentido den Asesinato sin Sentido), profesor James Alan Fox y Jack Levin ta declara: “Tin persona cu ta mas inclina na violencia cu otronan, sinembargo ainda nan tin un boluntad liber. Aunke e deseo di mata ta ser controla door di varios forsa interno y externo, e ta sigui duna hende e posibilidad di scohe y dicidi, y pesei hende mester por duna cuenta di loke nan ta haci y carga e culpa di esei.”
[Cuadro/Plachi na pagina 7]
UN DOCTER SU OPINION DI VIOLENCIA DEN WEGA DI COMPUTER
Dr. Richard F. Corlin, expresidente di e Asociacion Medico Mericano, a duna un speech na un grupo di docter cu a caba di slag na Filadelfia, Pennsylvania, Merca. Den e speech el a papia tocante wega di computer cu ta stimula violencia. Algun di e weganan aki ta duna bo punto pa herida cu bo ocasiona, mas punto pa un tiro den curpa, y asta mas punto ainda pa un tiro den cabes. Bo ta mira sanger ta spuit sali, y seso ta plama for di otro y ta spat tur riba pantaya.
Dr. Corlin a comenta cu muchanan no tin mag di core auto, ni bebe bebida alcoholico ni huma ora nan ta mucho jong. Caba el a bisa: “Pero nos ta laga nan train si pa bira pistolero na un edad ora cu ainda nan no a siña controla nan impulsonan ni nan no tin e madures y disiplina necesario pa uza e armanan cu nan ta hunga cu ne na un manera safe. . . . Nos tin cu siña nos yiunan for di principio cu semper violencia tin consecuencia, anto consecuencia serio.”
Lamentablemente, en bes di siña cu crimen tin consecuencia, hopi bes mucha ta bira e victima inocente di crimen violento. Estadistica ta mustra cu arma di candela ta mata dies mucha pa dia na Merca. Dr. Corlin a bisa: “Merca tin e porsentahe mas halto na mundo di mucha cu ta muri door di arma di candela.” Su conclusion? “Violencia cu arma di candela ta un menasa pa e salubridad publico di nos pais. Esaki ta un echo.”
[Cuadro na pagina 9]
FACTORNAN CU TA CONTRIBUI NA CRIMEN VIOLENTO
Hopi experto ta di opinion cu e siguiente cosnan por contribui na crimen sin sentido:
Famia kibra
Gruponan motiva pa odio, extremistanan
Cultonan peligroso
Violencia den entretenimento
Contacto cu violencia di berdad
Uzo di droga
Inhabilidad pa trata cu problema
Acceso facil na arma destructivo
Cierto tipo di malesa mental
[Plachi na pagina 8]
Un di e cinco atentadonan cu bom cu a mata por lo menos 12 persona y herida 80, Quezon City, Filipinas
[Reconocemento]
AP Photo/Aaron Favila 30 di December 2000
[Plachi na pagina 8]
Dos studiante ta mata un docente, 12 studiante y nan mes na Columbine High School, Colorado, Merca
[Reconocemento]
AP Photo/Jefferson County Sheriff’s Department 20 di April 1999
[Plachi na pagina 8, 9]
Un autobom ta mata por lo menos 182 persona y herida 132 na un club nocturno na Bali, Indonesia
[Reconocemento]
Maldonado Roberto/GAMMA 12 di October 2002