Tin un Solucion Realistico?

CRIMINALIDAD ta parce di ta un elemento fiho di sosiedad moderno. Apesar di e esfuerso y bon intencion di trahadonan social, di polis y di profesionalnan cu ta rehabilita criminalnan, mundo ta birando un luga mas y mas peligroso. Tin un solucion?

Bijbel ta mustra cu tin un cambio grandi na caminda. Esaki lo no bini mediante e esfuerso di gobiernonan humano. Tur gobernante humano ta limita, sin importa con noble nan metanan ta. Simplemente nan no tin e poder y e recursonan necesario pa eradica e causa di criminalidad ni pa establece un sistema permanentemente sigur.

Ta nos Creador lo implementa e cambio cu Bijbel ta papia di dje. Como Esun cu a traha universo, e tin e poder y e derecho legal pa haci loke hende no por haci. Bijbel ta describie como Esun cu “ta haci gobernantenan bira nada, y ta haci e huesnan di tera bira insignificante.” Ademas e ta bisa cu Dios tin ‘grandesa di poder.’ (Isaias 40:23-26) Ki cambionan Dios ta priminti, y con esakinan ta duna nos berdadero speransa cu lo bin un mundo miho?

Salmo 37:10 ta informa nos di e siguiente promesa di Dios: “Aki poco tempo e malbado lo no t’ei mas; maske cuanto bo busca su luga, e [malbado] lo no t’ei.” Dios ta bai deshaci di e malbadonan cabesura cu no tin intencion di cambia. Sinembargo, lo e no destrui tur hende. E salmista ta priminti hende cu ta dispuesto pa bira manso, humilde y pacifico: “Spera riba SEÑOR y sigui su caminda, y e lo halsa bo pa hereda e tera; ora cu e malbadonan wordo corta kita afo, abo lo mira esaki.” Despues cu e malbadonan ser elimina, e hendenan cu keda lo disfruta di “pas abundante”, un mundo sin ningun tipo di crimen.—Salmo 37:11, 34.

Cambio di Mente y Curason Ta Necesario

Djis destrui e malbadonan y salba bon hende no ta basta pa soluciona e problema di criminalidad unabes pa semper. Hopi bes crimen ta debi na e mal entrenamento cu hende su mente y curason a haya. Sinembargo, ta ei ta caminda e gobierno di Dios ta surpasa otro gobiernonan. Lo e percura instruccion y educacion practico pa train hende di manera cu nan lo stima husticia. Isaias 54:13 ta bisa: “SEÑOR lo siña tur bo yiu hombernan, y e prosperidad di bo yiu hombernan lo ta grandi.”

E resultadonan lo duna nos berdadero satisfaccion! Bijbel ta papia simbolicamente di e cambionan den hende cu un tempo kisas tawatin caracteristica violento manera di bestia. E ta bisa: “Lobo lo ta hunto cu lamchi di carne, leopardo lo cai drumi banda di lamchi di cabrito, y bishe, leon chikito y bestia gorda lo ta hunto.” Con bin? “Pasobra tera lo ta yen di e conocemento di SEÑOR, manera awa ta tapa lama.” (Isaias 11:6, 9) Pero abo cu bo famia no tin nodi warda te den futuro pa mira tal cambio. Con asina?

Bo Por Beneficia Awor

Tin hende cu for di awor ta haciendo e cambionan necesario pa prepara pa un mundo sin crimen. Ya caba nan ta bistiendo un personalidad nobo, e tipo di personalidad cu Dios kier mira den hende cu lo biba den su mundo nobo. (2 Pedro 3:13) Nan ta haci esaki door di aplica principionan biblico den nan bida. Tuma nota di e descripcion interesante cu Bijbel ta duna: “Boso mester ser haci nobo den e forsa cu ta impulsa boso mente, y boso mester bisti e personalidad nobo cu a ser crea segun e boluntad di Dios den berdadero husticia y lealtad.”—Efesionan 4:23, 24, NW.

Colosensenan 3:12-14 ta describi mas aleu e cualidadnan positivo cu hopi persona di curason honrado ta cultivando awor. E ta bisa: “Manera esnan cu a wordo scohi di Dios, santo y stima, bisti un curason di compasion, cariño, humildad, mansedumbre y pasenshi. Y boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci. Y ademas di tur e cosnan aki bisti amor, cual ta e laso perfecto di unidad.”

Abo lo kier haya yudansa pa bisti e personalidad cristian nobo? Miyones di hende rond mundo ya caba ta haciendo esei cu yudansa di Testigonan di Yehova. Asta hende cu tawata criminal violento a siña bisti un personalidad pacifico door di asisti na reunionnan cu ta ser teni regularmente na Salon di Reino y na congresonan grandi.a Si bo tin gana di beneficia di e excelente programa aki di educacion biblico, no basila pa tuma contacto cu e publicadonan di e revista aki. Gustosamente nan lo yuda bo pa bo ta entre e pueblo cu ta preparando awor pa biba den Dios su mundo nobo sin crimen.

[Nota]

[Plachinan na pagina 10]

Miyones di hende ta haya educacion pa biba den un mundo sin crimen