Hobennan Sa Puntra . . .

Con Mi Por Trata cu Tragedia Repentino?

“Dicon e teroristanan mester a mata net mi mama?”—Kevin.a

“[Prome cu 11 di september], mi tawata gusta tunnel. Awor mi ta imagina mi ta muri den un tunnel cu nan ta laga explota.”—Peter.

KEVIN su mama a ser mata den e atake di 11 di september 2001 contra World Trade Center na New York City. Peter no a sufri e mesun perdida teribel, pero toch e susesonan ei a afect’e masha hopi.

Un informe di noticia a bisa: “Miles di mucha cu ta biba na New York ta luchando cu problemanan mental relaciona cu [e atakenan di] 11 di september; problemanan cu den hopi caso lo keda te ora cu nan ta adulto.” Un cos alarmante ta cu e señalnan di trauma emocional tawata ‘mes tanto presente den muchanan cu no tawata ni banda di World Trade Center como den esnan cu a mira e atakenan personalmente.’b

E mesun problemanan mental ei por surgi relaciona cu otro tragedianan, manera explosionnan suicida na Israel y tiramento pa loco na otro parti. Relaciona cu tal tiramento, un experto riba e efecto di trauma a bisa: “Asta si [e muchanan] ta biba 2.000 miya leu, e susesonan aki toch por aumenta [nan] ansiedad.”

Dicon? Pasobra ora susesonan desastroso tuma luga, hobennan ta haya nan cu un avalancha di noticia y reportahenan bibo y direct. Television ta keda pasa bes tras bes imagennan spantoso di explosionnan terorista, tiramento na scol y desasternan natural, y pa hopi hoben ta bira masha dificil pa kita e imagennan ei for di nan mente. Nada straño anto cu segun un encuesta teni door di e Hunta di Educacion di New York City: “Seis luna despues cu World Trade Center a basha abou, 76 porshento di e 8.266 studiantenan di scolnan publico cu nan a entrevista ainda ta pensa cu frecuencia riba e atakenan terorista.”

Nos ta biba den loke Bijbel ta yama “temponan teribel.” (2 Timoteo 3:1-5, New International Version) Kico bo por haci pa trata cu e situacion ora tragedianan spantoso ta tuma luga?c

Dicon Cos Malo Ta Tuma Luga

Un manera pa trata cu e emocionnan cu ta casi aplasta bo, ta door di ‘stimula bo facultad di pensa cla.’ (2 Pedro 3:1, NW) Purba wak e situacion for di un punto di bista rasonabel y logico di acuerdo cu Dios su punto di bista. Por ehempel, kisas bo tin cu recorda bo mes cu hopi tragedia ta simplemente e resultado di “tempo y suseso imprevisto.” (Eclesiastes 9:11, NW) Hesucristo a duna un ehempel di esaki ora el a papia di un toren na Siloam cu a basha abou. Diesocho hende a muri den e desaster local ei. Sinembargo, Hesus a mustra bon cla cu no ta Dios a castiga e victimanan, nan a muri simplemente pasobra pa nan di malo nan tawata net na e luga ei, net na e momento ei. (Lucas 13:1-5) Meditando riba e echo aki por yuda bo mira desasternan na un manera mas obhetivo.

Pensa cla tambe por evita cu bo ta bira “raso contra SEÑOR” y culp’e pa e susesonan lamentabel. (Proverbionan 19:3) En bes di causa nos pena, Yehova ta e “Dios di tur consuelo.” (2 Corintionan 1:3) Ora tragedianan tuma luga, nos tin cu hala bai serca dje, y no kita for di dje den rabia. Medita riba e palabranan di Bijbel na Santiago 1:13: “No laga ningun hende bisa ora cu e wordo tenta: ‘Mi ta wordo tenta door di Dios’; pasobra Dios no por wordo tenta door di maldad, y e mes no ta tenta ningun hende.”d

Un suseso tragico cu a tuma luga siglonan pasa den Medio Oriente podise por ilustra e punto aki. Bijbel ta conta nos cu e unico sobreviviente di e catastrof ei a informa: “E candela di Dios a cai for di shelo y a kima e carnenan y e sirbidonan y a caba cu nan.” (Job 1:16) Ki un calamidad horibel! Y e homber morto spanta aki a pensa cu ta Dios tawata responsabel pa esei. Sinembargo, no tawata Dios pasobra for di Job 1:7-12 nos por saca afo cu no ta Dios a manda e candela, sino Dios su Adversario: Satanas e Diabel!

Esei tawata un situacion unico: Yehova a duna Satanas permit special pa e test Job su integridad. Pues anto, no conclui cu ta Satanas ta directamente responsabel pa desasternan natural manera tormenta y inundacion.e No obstante, Bijbel ta bisa cu “henter mundo ta bou di control di e malbado.” (1 Huan 5:19) Pesei e por uza agentenan humano pa causa daño y destruccion.

Sinembargo, nos no tin nodi sinti cu tur cos ta perdi. Considera un otro incidente, cu ta para skirbi den Bijbel na 1 Samuel 22:12-23. Einan nos ta lesa di un grupo di sacerdote fiel y nan famia cu a wordo masacra cruelmente. Sin duda Satanas tambe a instiga e Rei malbado Saul pa comete e acto brutal aki. Sinembargo, fiel David, cu despues tambe a bira Rei, a skirbi Salmo 52, den cua e ta expresa su confiansa cu Dios lo caba cu e hombernan malbado responsabel pa e calamidad ei.—Salmo 52:5.

Asina bo tambe por tin sigur awe cu Dios lo no tolera pa semper e actonan di asesinato y violencia inspira pa Diabel. Al contrario, Bijbel ta priminti cu Dios pronto lo uza su Yiu Hesus pa “destrui e obranan di Diabel”! (1 Huan 3:8) Cu tempo, lo no keda ningun rastro di e daño cu Satanas a causa. Mediante un resureccion, Dios por asta restaura bida di e personanan cu a muri den actonan tragico di violencia of terorismo.—Echonan 24:15.

Maneranan Practico pa Trata cu Tragedia

E speransa aki basa riba Bijbel por yuda bo evita cu miedo ta domina bo. Pero tambe tin algun paso practico cu bo por tuma. Por ehempel, tuma nota di e principio biblico cu tin na Proverbionan 12:25. Solamente door di comparti bo sintimentonan cu otro hende bo por haya e “bon palabra” di animacion. Ora bo papia cu otro hende lo bo ripara cu no ta bo so ta pasando door di e situacion dificil ei. Pesei si bo ta sinti hopi angustia, purba expresa bo sintimentonan na bo mayornan of na un ruman maduro den e congregacion cristian.f

Un otro sugerencia: No wak demasiado reportahe bibo y detaya di susesonan tragico den medionan di comunicacion. Si bo wak e cosnan ei, ta bira mas dificil pa bo kita imagennan spantoso for di bo mente.—Salmo 119:37.

Bo ta un cristian? Si ta asina, pega na bo rutina di actividadnan cristian. (Filipensenan 3:16, NW) E actividadnan ei ta entre otro, asisti na reunion hunto cu otro rumannan cristian y comparti bo creencianan cu otro hende. (Hebreonan 10:23-25) Esei lo yuda bo pa no keda pensa riba cosnan negativo so. Si bo isola bo mes, esei lo perhudica bo emocionalmente y spiritualmente.—Proverbionan 18:1.

Un cos hopi util den cualkier situacion di tension ta di sigui lesa Bijbel tur dia. E mama di un hobensita cu yama Loraine tawata muriendo di cancer. Tuma nota con Loraine a trata cu e situacion tragico aki. El a bisa: “Mi ta corda cu mi a lesa e buki di Job varios biaha durante e periodo dificil ei. E buki di Salmonan tambe a duna mi hopi consuelo. Segun cu mi tawata lesa e palabranan consolador den e Scritura, mi a sinti como si fuera Yehova tawata brasa mi.” Su ruman mohe Mishael tambe ta corda: “Si mi a keda sin lesa Bijbel un dia, mi a sinti e efecto. Automaticamente mi mente tawata bai bek riba cosnan negativo. Lesa Bijbel a duna mi e nutricion spiritual cu mi tawatin mester pa pasa door di cada dia.”

Si bo a sufri un perdida—specialmente e morto di un ser keri—lo bo por haya gran consuelo door di lesa e foyeto Ora un Persona Stimá Muri.g Tuma tempo pa lesa y medita riba tur e textonan cu ta ser menciona. Medita tambe riba e speransa di resureccion. Loraine a conta: “Mi tawata echt mira den mi mente con mi mama lo bini bek den e resureccion. Mi tawata imagina cu mi ta tend’e bisa: ‘Mi ta bek. Y, kico bo a cushina pa nos come?’ Esei tawata pone mi smile.”

Depende riba Yehova den oracion tambe por duna bo e fortalesa necesario pa soporta e tragedianan di mas piyo. Loraine ta corda: “Mi tawata banda di mi mama ora el a hala su ultimo rosea. Mesora mi a pidi Yehova duna mi e fortalesa pa persevera y pasa door di esaki. Mesora mi a sinti e pas di Dios.” Sea spesifico den bo oracionnan na Yehova. Lag’e sa kico precis bo ta sinti. E salmista a urgi: “Drama boso curason su dilanti.”—Salmo 62:8.

Segun cu tempo ta pasa, angustia riba tera probablemente lo aumenta. (2 Timoteo 3:13) Pero Bijbel ta priminti: “Hacidonan di maldad lo wordo corta kita afo . . . Ma e humildenan lo hereda e tera, y lo deleita nan mes den pas abundante.” (Salmo 37:9-11, 29) Si bo tene duro na e speransa aki, lo e por yuda bo trata cu e situacion ora cu tragedianan ta tuma luga.

[Nota]

[Plachi na pagina 14]

Kisas ta sabi pa bo no wak mucho imagennan angustioso na television