Un Parha Masha Bunita cu Pluma Tur na Wowo

DI E CORESPONSAL DI SPIERTA! NA INDIA

KISAS bo a rei for di e titulo cu nos ta papiando di powis. Un cos ta sigur, powis macho tin un cola mundialmente famoso.a Pero bo a yega di puntra bo mes ta kico ta e proposito di e plumanan extrabagante ei y si e criatura aki tin mas cos sobresaliente fuera di su beyesa?

Tin tres sorto di powis, y nan ta miembro di e famia di parha fazant. Den e articulo aki nos lo papia di e powis di India, yama tambe powis comun. Su colo ta principalmente blou berde y e ta midi 200 pa 235 centimeter, incluso su cola di 150 centimeter. E plumanan di e cola ta berde mescla cu oro cu manchanan cu parce wowo colo blou y brons. Mayoria di e plumanan riba e curpa ta un blou berde metallic.

Powis ta oficialmente e parha nacional di India, y sin duda e tin un aparencia mahestuoso. Kisas ta pesei den algun idioma nan ta uza e expresion “orguyoso manera un powis” pa describi hende arogante. Sinembargo, e parha aki no ta dje antipatico ei manera su aparencia talbes ta laga bo pensa. De echo, ta masha facil pa haci powis manso. Tin hende ta consider’e un parha sagrado. Pa e motibo aki, cunukeronan den pueblitonan di India tin biaha ta soporta e parhanan numa ora nan ta menasa nan cunucunan di maishi.

Nan Tremendo Show

Claro cu loke ta haci powis famoso ta e tremendo show cu nan ta duna door di span nan cola manera un waira impresionante. Kico ta e proposito di e show aki? Aparentemente tur esei ta pa impresiona e embranan.

Powis embra no ta cai pa cualkier macho, pero uno cu tin yen di pikete si e no por resisti. E powis su cola hancho habri, cubri cu wowonan di colo briyante, ta capta tur e embra su atencion. E embranan sa scohe como nan pareha e macho cu tin e plumanan mas impresionante.

Pero habrimento di e cola ta solamente un parti di e show. Prome, e macho ta habri su cola largo manera un waira y ta lag’e bin dobla dilanti. Caba e ta cuminsa su baile yen di pikete. Su halanan colo castaña ta colga na su banda segun cu e ta sagudi su curpa y asina ta pone e plumanan saca un zonido suave. Tambe e ta dal un grito fuerte cu no ta nada melodioso, pero por lo menos e embra ta haya sa cu e macho ta interesa den dje.

De bes en cuando e powis embra lo purba haci un imitacion suak di e payasadanan di e macho, pero mayoria biaha, e embra ta duna e impresion di no ta interesa. Pero toch, ta e macho cu mas pikete lo hay’e. Un powis macho por ‘gana’ asta 5 embra y bira tata di te cu 25 puyito den un solo aña.

Bida di Famia di Powis

Despues di e temporada di brui, ta tempo pa cambia pluma. Como promedio, un powis macho adulto su cola completo ta consisti di mas cu 200 pluma. Antes habitante di pueblitonan na India tawata colecciona e plumanan pa exporta nan pa paisnan Occidental. Pero awor ta prohibi pa exporta e plumanan ya asina ta proteha e parhanan. Claro cu localmente si nan ta uza e plumanan ainda pa traha waira y otro articulonan bunita.

Anochi powis ta subi lentamente den palo halto pa busca un bon luga di drumi. Mainta nan ta baha lentamente bek for di palo. Kisas e criaturanan aki ta un encanto pa wowo, pero no spera masha cos si di nan cantamento. Nan gritonan kehoso ta kibra e silencio di anochi, te ora cu yega nan ora di baha mainta pa cuminsa busca cuminda.

Powis ta come casi tur cos. Esei ta inclui insecto, lagadishi, y tin biaha asta colebra chikito, y tambe simiña, grano, bonchi y raiznan moli di mata di cosecha.

Aunke di aparencia powis macho ta parce masha orguyoso, nan ta bon den proteha nan mes. Powis ta detecta peliger masha lihe, por ehempel un pushi cu ta sluip rond. E powis ta reacciona door di core door di mondi na grito pa spierta di e peliger inminente. Otro machonan ta join e. Nan ta core sorprendentemente lihe, un tras di otro. Sinembargo, e embranan si ta nenga di bandona nan puyitonan, asta ora nan ta confronta e peliger di mas grandi.

E cola largo di pluma aparentemente no ta stroba powis di move lihe, maske e cola ta parce un tiki incumbiniente ora e parha ta lanta buelo. Pero unabes powis ta den laira, nan ta bula na gran velosidad, batiendo nan halanan rapidamente.

Ora e polechinan tin ocho luna, nan ta cla pa bandona nan mayornan y cuminsa percura pa nan mes. Nan baimento ta yuda e mama prepara pa e siguiente yiunan cu e tin cu cria. Ta ora e machonan hoben tin ocho luna nan cola ta cuminsa crece, pero ta te ora nan tin cuater aña nan ta haya tur nan plumanan di macho. E ora ei nan ta cla pa cuminsa nan propio famia.

Powis den Transcurso di Historia

Powis bibo a dorna hardinnan di antiguo Grecia, Roma y India. Bo ta haya powis den arte y obhetonan decorativo di cortenan real di India durante miles di aña. De echo, e Trono di Powis tawata ser considera un di e ehempelnan mas importante di e rikesanan di India. Dorna cu cantidad di djamanta, e tawatin segun informe 108 rubi y 116 esmeralda. Tawatin un powis di oro riba e capa di e trono, y ta djei el a haya su nomber. Ta solamente na ocasionnan ceremonial importante nan tawata arma e trono ei y sinta riba dje.

Historia biblico ta mustra cu powis tawata entre e cosnan balioso cu Rei Salomon a importa. Ta interesante pa imagina powis ta cana pronk den su hardinnan real. (1 Reinan 10:22, 23) E parhanan aki siguramente ta laga nos sa cu tin un Diseñador inteligente. Ora powis ta balia cu su cola di colonan impresionante hancho habri, bo no por keda sin admira e habilidadnan artistico di Yehova, e Dios cu “a crea tur cos.”—Revelacion 4:11.

[Nota]

[Plachi na pagina 16]

No ta tur biaha e baile di e macho ta impresiona e embra

[Reconocemento]

© D. Cavagnaro/Visuals Unlimited

[Plachinan na pagina 17]

Powis embra ta bon mama

[Reconocemento]

© 2001 Steven Holt/stockpix.com

[Reconocemento pa Potret na pagina 15]

Powis: Lela Jane Tinstman/Index Stock Photography

[Reconocemento pa Potret na pagina 16]

John Warden/Index Stock Photography