SIGUI VIGILA!
Dicon Politica Ta Dividi Hende?—Kico Bijbel Ta Bisa?
Rond mundo, hende ta mas dividi cu nunca debi na politica. Un encuesta cu Pew Research Center a haci den 19 pais na 2022 ta mustra cu 65% di e hendenan adulto cu a participa na e encuesta ta bisa cu, den nan pais, e hendenan cu ta apoya diferente partido politico no ta di acuerdo cu otro riba casi niun tereno.
Caminda bo ta biba tambe mas y mas hende ta dividi riba tereno politico? Dicon esey ta e caso? Tin solucion? Laga nos wak kico Bijbel ta bisa.
Actitud cu ta causa division
Bijbel a profetisa cu den nos tempo, esta, den “e ultimo dianan,” hopi hende lo tin un actitud cu ta pone cu ta imposibel pa nan ta uni.
“Den e ultimo dianan lo bini temponan critico, dificil pa trata cu ne. Pasobra hende lo stima nan mes; ... nan lo no ta dispuesto pa cera ningun acuerdo.”—2 Timoteo 3:1-3.
Hopi gobierno tin dificultad pa funciona bon a pesar di e esfuersonan cu hopi hende ta haci. Hende cu punto di bista completamente diferente ta haya cu ta dificil, of imposibel, pa traha hunto pa resolve problema. Loke mundo ta experencia ta confirma loke Bijbel a bisa hopi tempo pasa.
“Hende ta domina hende, y esey ta causa sufrimento.”—Eclesiastes 8:9.
Sinembargo, Bijbel ta mustra kico ta e solucion: un gobierno dirigi pa un persona cu por elimina tur problema cu mundo ta confronta awe.
Un lider cualifica cu ta stima hende
Bijbel ta papia di un solo lider cu ta cualifica: Hesucristo. Hesus tin poder, autoridad y deseo pa uni hende y pa trece pas.
“Durante su reinado, hende husto lo ta manera mata cu ta spruit di nobo, y lo tin pas tur caminda.”—Salmo 72:7.
“Tur nacion lo sirbie.”—Salmo 72:11.
Hesus ta un lider ideal pasobra e ta stima hende, y e kier yuda hende, specialmente hende cu ta ser trata inhustamente.
“Lo e libra hende pober cu ta sclama pa yudansa; lo e libra hende oprimi y hende cu no tin niun persona pa yuda nan. Lo e tene compasion cu hende oprimi y cu hende pober, y lo e salba bida di hende pober. Lo e libra nan for di opresion y violencia.”—Salmo 72:12-14.
Siña mas tocante e Reino di Dios, esta, e gobierno den cielo cu Hesus na cabes. Haya sa ki beneficio e Reino ey ta trece pa bo y con bo por apoya e Reino ey.
Wak e video Kiko e Reino di Dios Ta?
Lesa e articulo “E Reino di Dios—Un Gobierno sin Corupcion.”