Kico Bijbel Ta Bisa Tocante Biba Como Vegan?

Awendia, hopi hende ta interesa pa biba como vegan.

• “Tin un filosofia tras di biba como vegan. Biba como vegan ta encera cu un persona ta haci tur su posibel pa evita tur forma di explotacion of maltrato di bestia pa por haya cuminda, paña of otro cos.”—The Vegan Society.

Ademas, hende ta biba como vegan pa proteha medio ambiente, pa mehora nan salud of pa motibo religioso.

• “Biba como vegan ta diferente for di otro dieet cu hende ta sigui. Compara cu otro dieet, tin un filosofia tras di biba como vegan. Hende ta mir’e como un decision serio basa riba cierto norma; nan ta mir’e como un manera pa haci loke nan por pa salba nos planeta.”—Britannica Academic.

Si hende biba como vegan, esey por salba nos planeta? Kico Bijbel ta bisa?

Con Dios ta mira hende y bestia?

Bijbel ta bisa cu nos Creador, Jehova Dios,a ta considera hende superior na bestia. Ademas, Dios a permiti hende tin dominio riba bestia. (Genesis 1:27, 28) Na dado momento, Dios a hasta permiti hende come bestia. (Genesis 9:3) Sinembargo, e no ta aproba di maltrato di bestia.—Proverbionan 12:10.

Bijbel ta bisa cu cada persona mes mester dicidi si nan ta come carni di bestia of no.b E decision pa come carni of keda sin come carni no ta haci hende un mihor persona den bista di Dios. (1 Corintionan 8:8) Niun hende no mester critica un otro persona pa loke e ta come.—Romanonan 14:3.

Con cos lo drecha den futuro?

Bijbel ta bisa cu nos manera di biba lo no drecha e problemanan di e mundo aki. Hopi problema den e mundo aki tin un causa politico, social of economico. Y niun hende no por drecha e cosnan ey. Bijbel ta bisa:

• “Bo no por haci stret loke ta troci.”—Eclesiastes 1:15.

Nos Creador si lo drecha e problemanan cu nos ta enfrenta. Bijbel ta describi na un manera figurativo kico Dios lo bay haci.

• “Y mi a mira un cielo nobo y un Tera nobo; pasobra e cielo anterior i e Tera anterior a caba na nada, y lama no ta existi mas.”—Revelacion 21:1.

Dios lo reemplasa e gobiernonan humano (“cielo anterior”) cu su Reino celestial (“cielo nobo”). Su Reino lo caba cu hende malbado (“Tera anterior”), y su Reino lo goberna riba hende cu ta dispuesto pa somete nan mes na su autoridad (“Tera nobo”).

Ta solamente ora Dios su Reino goberna Tera, hende lo siña con pa biba na paz cu bestia y respeta medioambiente.—Isaias 11:6-9.