Dicon Mundo Tin Asina Tanto Odio?​—Kico Bijbel Ta Bisa?

Den noticia, nos ta tende hopi tocante guera y tocante hende cu ta sembra odio of haci cos violento contra hende di otro cultura of otro luga.

• “Pa motibo di e conflicto entre Israel y Gaza y pa motibo di hende cu ta promove odio y violencia, tin mas y mas comentario riba red social di hende cu ta expresa odio contra otro.”​—The New York Times, 15 di november 2023.

• “Desde 7 di october, tin hopi mas hende cu ta expresa odio of haci cos violento pa motibo di prehuicio contra hende di otro cultura of luga.”​—Dennis Francis, presidente di Asamblea General di Nacionnan Uni, 3 di november 2023.

Guera, violencia y expresa odio contra hende di otro luga of cultura no ta nada nobo. En realidad, Bijbel ta papia tocante hende den pasado cu tabata “mik nan palabranan cruel manera flecha” y hende cu tabata promove guera y violencia. (Salmo 64:3; 120:7; 140:1) Sinembargo, Bijbel ta bisa cu e odio cu nos ta wak awe ta un indicacion di algo significante.

Odio​—Un caracteristica di e tempo cu nos ta bibando aden

Bijbel ta menciona dos motibo pakico odio ta algo asina comun awe.

1. 1. El a papia tocante un periodo unda “amor di mayoria di hende lo fria.” (Mateo 24:12) Na luga di mustra amor, en general, hende lo haci cos cu ta hiba na mas odio.​—2 Timoteo 3:1-5.

2. 2. E cantidad di odio cu tin awe ta debi na e influencia di Satanas, e Diabel. Bijbel ta bisa cu “henter mundo ta den poder di e Malbado.”​—1 Juan 5:19; Revelacion 12:9, 12.

Pero, Bijbel ta bisa tambe cu pronto Dios ta bay elimina e fuente di odio. Ademas di esey, Dios ta bay cura tur dolor cu odio a causa. Bijbel ta priminti:

• Dios lo “seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”​—Revelacion 21:4.