Anton Petrus/Moment via Getty Images
SIGUI VIGILA!
Un Guera Mundial Ta Inevitabel?—Kico Bijbel Ta Bisa?
Durante e ultimo 30 añanan, hopi hende tabata pensa cu e situacion na mundo tabata bastante stabiel. Hasta nan tabata pensa cu situacion di mundo tabata mehorando. Sinembargo, loke ta tumando luga ultimo tempo a pone hopi hende cambia di opinion.
“Israel cu Hezbollah ta bringa contra otro na frontera di Libanon. Pesey, hende a cuminsa preocupa cu e guera na Gaza lo influencia e otro paisnan den bisindario.”—Reuters, 6 di januari 2024.
“E partidonan cu ta colabora cu Iran ta atacando for di diferente punto strategico. Fuera di esey, Iran a cuminsa atrobe cu su programa nuclear. Debi na e desaroyonan ey, Iran ta birando un menasa pa Merca y Merca su aliadonan, specialmente cu awor Rusia y China ta apoya Iran.”—The New York Times, 7 di januari 2024.
“E atakenan di Rusia riba Ucrania ta causa hopi daño.”—UN News, 11 di januari 2024.
“China su economia ta sigui crece y su forsa militar ta sigui aumenta. Taiwan ta sinti mas y mas cu nan kier ta independiente. Anto e relacion entre e gobierno di Merca y di China ta sigui empeora. Tur e cosnan aki ta pone cu cualkier momento por surgi un crisis entre e paisnan aki.”—The Japan Times, 9 di januari 2024.
Bijbel ta papia tocante e situacion instabil cu tin na mundo aworaki? E situacion aki lo hiba na un guera mundial?
Bijbel a profetisa e sucesonan actual
Bijbel no a profetisa tocante ningun guera specifico cu ta tumando luga awe. Sinembargo, Bijbel a profetisa si tocante e aumento di guera cu ta indica e tempo cu nos ta biba aden y cu ta kita “paz for di riba Tera.”—Revelacion 6:4.
E buki Daniel a profetisa cu “den e tempo di fin”, varios potencia mundial lo drenta den conflicto cu otro; nan lo lucha pa poder. E bringamento ey lo envolve poder militar grandi, y e paisnan lo gasta nan “tesoronan”, of recurso financiero.—Daniel 11:40, 42, 43.
Tin un guera na caminda
Bijbel ta mustra cu situacion na mundo lo bira pio prome cu e bira mihor. Hesus a profetisa cu “lo tin un tribulacion grandi manera no a yega di sosode nunca, for di principio di mundo te awor.” (Mateo 24:21) E “tribulacion grandi” aki lo caba den un guera cu yama Armagedon. Armagedon ta ser describi como “e guera cu lo tuma luga riba e gran dia di Dios, e Todopoderoso.”—Revelacion 16:14, 16.
Sinembargo, Armagedon lo salba humanidad, no destruye. Mediante e guera aki, Dios lo trece un fin na tur gobierno humano, cu a causa hopi guera destructivo. Pa haya sa con Armagedon lo trece paz pa semper, lesa e siguiente articulonan: