Marek M. Berezowski/Anadolo Agency via Getty Images
SIGUI VIGILA!
E Guera na Ucrania Tin un Aña Caba Andando—Ki Speransa Bijbel Ta Duna?
Lamentablemente, diabierna 24 di februari 2023, lo haci un aña caba cu e guera na Ucrania a cuminsa. Algun informe ta indica cu mas o menos 300.000 soldaat di Ucrania y di Rusia a muri of ser herida. Ademas, e informenan ta indica cu mas o menos 30.000 hende civil a perde nan bida den e guera aki. Sinembargo, ta posibel cu e cifranan ta mucho mas halto.
Ta tristo pa bisa, pero parce cu e guera aki lo no caba por lo pronto.
“Casi un aña a pasa desde cu e soldaatnan di Rusia a invadi Ucrania, y no ta parce cu tin un solucion pa e guera aki. Ni Rusia ni Ucrania no ta cerca di logra un victoria. Ademas, no tin mucho progreso den e negociacionnan pa paz.”—NPR (National Public Radio), 19 di februari 2023.
Cu bon motibo, hopi hende ta masha preocupa tocante e sufrimento cu e guera aki y otro conflicto ta causa pa hende inocente rond mundo. Ki speransa Bijbel ta duna? Guera lo caba algun dia?
Un guera cu lo caba cu tur otro guera
Bijbel ta papia di un guera cu lo trece salbacion pa humanidad. E guera ey lo no destrui tur hende. Bijbel ta yama e guera ey Armagedon. Bijbel ta describi e guera ey como e guera cu lo tuma luga riba e gran dia di Dios Todopoderoso. (Revelacion 16:14, 16) Dios lo uza e guera ey pa caba cu tur gobernacion humano cu ta responsabel pa tur e gueranan destructivo cu tin. Pa haya sa con Armagedon lo trece paz duradero riba Tera, lesa e siguiente articulonan: