Inteligencia Artificial—Bendicion of Maldicion?—Kico Bijbel Ta Bisa?

Recientemente, algun gobernante prominente, cientifico y experto den tecnologia a menciona loke hende lo por logra cu inteligencia artificial (AI). Nan ta reconoce cu por haci bon uzo di inteligencia artificial, pero nan a menciona nan preocupacion tambe pa e posibel peligernan cu esey ta trece cu ne.

• “Inteligencia artificial ta un di e tecnologianan mas poderoso di nos tempo; por uza inteligencia artificial pa yuda hende ... Pero ta importante tambe pa reconoce cu e inteligencia ey por forma un peliger grandi pa siguridad di hende; e por viola derecho di hende y viola nan privacidad. Ademas, e por kibra e confianza cu hende tin den democracia.”—Kamala Harris, vice-presidente di Merca, 4 di mei 2023.

• “Inteligencia artificial (AI) por yuda hopi hende den e ramo di cuido medico. Sinembargo, e inteligencia ey por ta un peliger tambe pa salud y felicidad di hende.” Dia 9 di mei 2023, un grupo internacional di dokter y di experto den ramo di cuido medico, dirigi pa Dr. Frederik Federspiel, a skirbi esey den e revista BMJ Global Health.a

• “Ya caba hende por uza inteligencia artificial pa plama informacion falso. Pronto, lo e por kita trabou di hende. Algun hende den ramo di tecnologia ta hopi preocupa. Segun nan, inteligencia artificial por hasta forma un menasa pa henter humanidad.”—E corant The New York Times, 1 di mei 2023.

Cu tempo, nos lo haya sa si hende lo uza inteligencia artificial pa yuda otro hende of pa perhudica nan. Kico Bijbel ta bisa tocante esey?

Dicon hende ta duda cu avance den tecnologia lo beneficia humanidad?

Bijbel ta mustra dicon hende no por garantisa cu loke nan ta crea riba tereno tecnologico lo ser uza solamente pa un bon causa.

1. 1. Hasta ora hende crea algo cu bon intencion, nan lo no por sa adelanta ki consecuencia negativo nan inventonan por tin.

   • “Un caminda por parce bon den bista di hende, pero, na final di cuenta, e caminda ey ta hiba na morto.”—Proverbionan 14:12.

2. 2. Un persona no por evita un hende di uza of maluza loke el a crea.

   • “Lo mi tin cu bay laga [tur loke mi a traha duro p’e] pa otro hende. Mi no sa si ta hende sabi of si ta hende bobo lo disfruta di loke mi a traha duro p’e. Di tur manera, nan lo bira doño di tur e cosnan cu mi a logra haya cu masha esfuerso y sabiduria aki riba Tera.”—Eclesiastes 2:18, 19.

E dudanan ey cu hende tin ta mustra bon cla dicon nos mester di guia di nos Creador.

Ken nos por confia?

Nos Creador ta priminti cu nunca lo e no permiti hende ni cualkier invento di hende, destrui Tera of humanidad.

• “Tera lo existi pa semper.”—Eclesiastes 1:4.

• “Hende husto lo hereda Tera, y nan lo biba riba dje pa semper.”—Salmo 37:29.

Pa medio di Bijbel, nos Creador ta guia nos den bida, pa asina den futuro nos por biba den paz y trankilidad. Pa haya sa mas di loke Bijbel ta priminti, lesa e articulonan: “Tin un Guia Confiabel Cu Por Yuda Bo Haya un Futuro Sigur?” y “Berdadero Speransa pa un Mihor Futuro.”