2023: Un Aña Cu A Duna Hende Hopi Ansiedad​—Kico Bijbel Ta Bisa?

Durante 2023, hopi di e sucesonan rond mundo ta mustra bon cla cu nos ta bibando den e tempo cu Bijbel ta yama “e ultimo dianan.” (2 Timoteo 3:1) Laga nos wak con varios di e sucesonan ey ta cuadra cu loke Bijbel a bisa di antemano tocante e tempo cu nos ta biba aden.

Bijbel y e sucesonan di 2023

“Guera den varios luga.”​—Mateo 24:6.

• “Tin mas y mas conflicto violento na varios parti di Tera.”a

“Den un luga tras di otro lo tin temblor.”​—Marco 13:8.

• “For di e prome lunanan di 2023, tabatin 13 temblor di un magnitud mas halto cu 7 cu a tuma luga rond mundo. For di tempo cu a cuminsa registra temblor, nunca algo asina a pasa.”b

“Escenanan spantoso.”​—Lucas 21:11.

• “Tera a sali for di e fase di keinta pa e fase cu Tera ta hasa.c

“Scarsedad di cuminda.”​—Mateo 24:7.

• “2023: Un otro aña sumamente dificil pa hende cu ta lucha pa percura cuminda pa nan famia.”d

“Temponan critico, dificil pa trata cu ne.”​—2 Timoteo 3:1.

• “Rond mundo, un di cada ocho hende ta sufri di problema cu salud mental.”e

Kico nos por spera pa 2024?

Niun hende no por bisa sigur con cos lo bay den 2024. Pero loke ta pasando rond mundo ta indica cu pronto e Reino di Dios, cu ta un gobierno celestial, lo reemplasa tur gobierno humano y pone fin na tur loke ta causa sufrimento y ansiedad.​—Daniel 2:44; Revelacion 21:4.

Pero kico nos por haci aworaki si nos ta sinti ansiedad? Nos por pidi Dios yuda nos. Bijbel ta bisa:

“Ora mi tin miedo, mi ta pone mi confianza den bo.”​—Salmo 56:3.

Con nos por mustra confianza den Dios? Esey ta ora nos haci esfuerso pa haya sa mas tocante e bunita futuro cu Bijbel ta priminti. E tempo ey, lo no tin sufrimento mas. Nos curso di Bijbel interactivo gratis por yuda abo y bo famia beneficia di e promesanan cu tin den Bijbel.