Guera y Cambio di Clima Ta Causa Mas Scarsedad di Cuminda Rond Mundo—Kico Bijbel Ta Bisa?

E guera na Ucrania y e efectonan di cambio di clima ta causa hopi problema den suministro di cuminda rond mundo. Specialmente, na pais di poco recurso caminda tin hopi scarsedad di cuminda esey ta causa hopi problema.

• “Guera, cambio di clima, prijs di coriente cu ta subi y varios otro cos ta stroba produccion di cuminda y esey ta causa scarsedad di cuminda.”—António Guterres, secretario general di Nacionnan Uni, 17 di juli 2023.

• “Algun experto ta premira cu debi cu Rusia a hala atras for di e acuerdo cu nan a cera cu ta permiti Ucrania exporta grano, esey lo causa mas scarsedad di cuminda. Esey na su turno lo pone e prijsnan di cuminda subi mas na e paisnan di menos recurso, manera e paisnan na Noord Africa y Medio Oriente.”—E website Atalayar.com, 23 di juli 2023.

Analisa loke Bijbel ta bisa tocante scarsedad di cuminda y e speransa cu Bijbel ta duna pa futuro.

Bijbel a bisa di antemano cu lo tin scarsedad di cuminda

• Hesus a profetisa lo siguiente: “Nacion lo lanta contra nacion y reino contra reino, y lo tin scarsedad di cuminda.”—Mateo 24:7.

• Revelacion ta papia tocante cuater coredo di cabay simbolico. Un di e coredonan di cabay ta representa guera. E coredo cu ta bin despues di dje ta representa hamber. Esey ta referi na un tempo cu lo tin scarsedad di cuminda y cu prijs di cuminda lo subi drasticamente. Bijbel ta bisa: “Mi a mira un kabai pretu aparesé; esun sintá riba dje tabatin un balansa den su man. Mi a tende un kos ku a zona manera un stèm, bisa ... : ‘Solamente un kana di trigo pa e suèldu di henter un dia di trabou i solamente tres kana di sebada pa e suèldu di henter un dia di trabou!’”—Revelacion 6:5, 6, Beibel papiamentu koriente.

E profecianan di Bijbel aki tocante scarsedad di cuminda ta cumpliendo awor, den e tempo cu Bijbel ta yama “e ultimo dianan.” (2 Timoteo 3:1) Pa haya sa mas tocante “e ultimo dianan” y e coremento di e cuater coredonan di cabay den e buki Revelacion, wak e video Mundu A Kambia Desde 1914 y lesa e articulo “E Cuater Coredonan di Cabay—Ken Nan Ta?”

Con Bijbel ta yuda nos?

• Bijbel ta contene conseho practico cu por yuda nos trata cu situacion dificil, incluso aumento continuo di prijs di cuminda y hasta scarsedad di cuminda. Pa algun ehempel lesa e articulo: “Siña Con pa Biba cu Menos Placa.”

• Ademas, Bijbel ta duna nos speransa cu e situacion di mundo lo drecha. Bijbel ta priminti cu un dia “lo tin abundancia di grano riba Tera” y tur hende lo tin suficiente cos di come. (Salmo 72:16) Pa haya sa mas informacion tocante loke Bijbel ta priminti pa futuro y dicon bo por confia loke Bijbel ta bisa, lesa e articulo: “Berdadero Speransa pa un Mihor Futuro.”