Costo di Bida Ta Subi Rond Mundo—Kico Bijbel Ta Bisa?

Presidente di World Bank Group a bisa lo siguiente den un rapport na juni 2022: “Economia di e paisnan rond mundo ta enfrentando dos problema grandi: costo di bida ta subiendo drasticamente, y economia na varios pais no ta creciendo mucho.”

International Monetary Fund a bisa: “Prijs di combustibel y cuminda a subi rapidamente. Esey a afecta e paisnan cu tin poco entrada mucho mas tanto.”

Bijbel ta yuda nos compronde dicon nos ta enfrentando e problemanan economico aki. Ademas, Bijbel ta mustra nos con nos por trata cu e problemanan ey, y e ta duna nos speransa cu den futuro lo tin un solucion pa tur problema economico.

Costo di bida ta subi durante “e ultimo dianan”

• Bijbel ta yama e tempo cu nos ta biba aden “e ultimo dianan.”—2 Timoteo 3:1.

• Hesus a indica cu durante e periodo aki lo sosode cos spantoso, ‘escena spantoso.’ (Lucas 21:11) E echo cu prijs di varios cos ta subi na un manera drastico ta pone hende haya miedo. Hopi hende ta preocupa tocante futuro. Nan no sa si nan lo por sigui provee pa nan famia.

• Den Bijbel, e buki Revelacion a bisa di antemano cu prijs di cuminda lo sigui subi durante e tempo aki. E ta bisa: “Mi a tende un kos ku a zona manera un stèm, bisa . . . : ‘Solamente un kana di trigo pa e suèldu di henter un dia di trabou.’”—Revelacion 6:6, Beibel papiamentu koriente.

Si bo kier haya sa mas tocante “e ultimo dianan” y tocante e profecia di e buki Revelacion, wak e video Mundu A Kambia Desde 1914, y lesa e articulo “E Cuater Coredonan di Cabay—Ken Nan Ta?”

E solucion pa tur problema economico

• “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come.”—Isaias 65:21, 22.

• “Lo tin abundancia di maishi den e Tera, riba cabes di e seronan.”—Salmo 72:16.

• “‘Pa motibo di e opresion di e pobernan, pa motibo di e kehamento di esnan den necesidad, lo mi lanta awor”, SEÑOR ta bisa.”—Salmo 12:5.

Pronto Dios lo pone un fin na e sistema economico inhusto aki, no na un pais so, sino rond mundo. Pa mira con esey lo sosode, lesa e articulo “Ta Posibel pa Bin cu un Sistema Economico Husto?”

For di awor, Bijbel por yuda nos trata cu aumento di costo di bida. Con asina? Bijbel ta siña nos na un manera practico con pa uza placa na un manera sabi. (Proverbionan 23:4, 5; Eclesiastes 7:12) Pa mas informacion, lesa e articulonan “Proteha Bo Medio di Bida” y “Siña Con pa Biba cu Menos Placa.”