LOKE BO POR HACI ORA PRIJS SUBI

Sigui Carga Speransa

E prijsnan caminda bo ta biba a subi mientras cu bo salario a keda mescos? Bo ta preocupa pasobra bo no sa si lo bo por percura pa bo mes y pa bo famia? Si ta asina, kisas bo ta ansha tocante futuro. Pero, hasta ora bo ta den circunstancia dificil, ta importante pa bo sigui carga speransa.

DICON ESEY TA IMPORTANTE?

Hende cu tin speransa no ta djis sinta warda pa cos bon sosode. Speransa ta motiva nan pa tuma accion y haci tur nan esfuerso pa drecha nan situacion. Por ehempel, varios investigacion ta mustra cu hende cu tin speransa ...

mayoria biaha ta trata mihor cu problema
por haci cambio ora esey ta necesario
ta tuma bon decision den bida, y esey ta yuda nan ta mas saludabel

LOKE BO POR HACI

Prome, wak con Bijbel por yuda bo awendia. Bijbel tin varios conseho practico cu por yuda bo ora prijs subi. E consehonan aki por yuda bo, por ehempel, pa bo tin mas control riba bo bida y pa bo ta mihor prepara pa enfrenta problema den futuro.

“Siña pensa cla y bon, y esey lo yuda bo; perspicasia lo proteha bo.”—Proverbionan 2:11.

Di dos, wak loke Bijbel ta bisa tocante futuro. Ora bo mira cu Bijbel ta duna bon conseho, lo bo haya mas gana di sa loke e ta bisa tocante futuro. Por ehempel, lo bo siña cu Dios mes a priminti cu e kier pa bo tin “un speransa y un bon futuro.” (Jeremias 29:11) Con Dios lo cumpli cu su promesa? Esey ta mediante e Reino di Dios.

KICO E REINO DI DIOS TA, Y KICO LO E HACI?

E Reino di Dios ta un gobierno cu lo goberna henter Tera. (Daniel 2:44; Mateo 6:10) Lo e goberna for di cielo, lo e caba cu sufrimento y pobreza y tur hende lo biba na paz. Ademas, nan lo tin tur loke nan mester pa nan ta feliz, manera e siguiente textonan ta mustra.

“Lo bo ta feliz y cos lo bay bon pa bo.”—Salmo 128:2.

“Nan [hende cu lo biba bou di e Reino] lo no traha duro pornada.”—Isaias 65:23.

“Lo tin abundancia di grano riba Tera.”—Salmo 72:16.

Miyones di hende ta confia den e promesanan ey, y nan ta convenci cu Dios “no por gaña.” (Tito 1:2) Lo bo tin gana di haya sa kico Bijbel ta siña? E speransa cu tin den Bijbel por duna bo forsa pa enfrenta problemanan financiero y pa mira futuro sin miedo.