LOKE BO POR HACI ORA PRIJS SUBI

Acepta Cu No Ta Tur Cos Ta den Bo Man

Ora e prijsnan subi tiki tiki, casi bo no ta nota esey, specialmente si e salarionan tambe subi. Pero ora e prijsnan subi lihe y e salarionan keda mescos, nos por bira ansha y haya stress, specialmente si nos tin cu percura pa nos famia.

Nos no por evita cu prijs ta subi. Pero si nos acepta cu no ta tur cos ta den nos man, esey lo por mehora nos situacion.

DICON ESEY TA IMPORTANTE?

Si nos acepta cu no ta den nos man cu prijs ta subi, lo ta mas facil pa ...

keda trankil. Ora nos ta trankil, nos ta pensa mas cla y ta tuma mihor decision.
evita mal custumber. Por ehempel, lo no ta sabi pa keda sin paga nos recibonan of pa gasta cen na cos cu nos no tin mester.
no discuti cu bo famia tocante placa.
wak kico nos por haci pa logra mehora nos situacion. Esey kisas ta nifica cu nos mester gasta menos placa y dicidi kico echt nos mester cumpra.

LOKE BO POR HACI

Sea dispuesto pa haci cambio. Na momento cu prijs subi lihe, lo ta bon pa purba di baha gasto. Algun hende ta gasta mas cen di loke nan tin, esey ta comosifuera nan ta landa contra di e coriente fuerte den lama. Esaki ta hopi duro! Como consecuencia, nan ta perhudica nan mes. Sin duda, si bo tin famia, lo bo kier cuida nan y zorg pa e cosnan cu nan tin mester. Pero no lubida si cu bo famia mester di bo amor, di bo tempo y di bo atencion mas cu cualkier otro cos.

“Kua di boso lo por rèk su bida niun krenchi si e preokupá?”—Lucas 12:25, Bijbel na papiamentu koriente.

“Nunca preocupa pa e dia di mañan, pasobra e dia di mañan lo tin su mes preocupacionnan. Cada dia tin su mes problemanan.”—Mateo 6:34.

Ora nos purba di mantene un bida luhoso ta comosifuera nos ta landa contra di e coriente fuerte den lama