Mundo Ta Gasta Mas cu 2 Biyon Dollar na Defensa Militar—Kico Bijbel Ta Bisa?

E cantidad di placa cu mundo den su totalidad ta gasta na defensa militar a kibra tur record. Na aña 2022, e suma a surpasa 2.24 biyon dollar Mericano. Esaki ta principalmente debi na e invasion di Rusia na Ucrania. Stockholm International Peace Research Institute (SIPRI) a saca un rapport na april 2023 cu ta mustra cu durante aña 2022:

• E cantidad di placa cu Europa ta gasta na defensa militar “a subi cu 13 porciento durante e aña ey. Esey tabata e aumento anual di mas grandi cu Europa tabatin durante e periodo despues di e guera friu.”

• “Rusia ... a aumenta e cantidad di placa cu nan ta gasta na defensa militar cu mas o menos 9,2 porciento. Esey a pone cu nan a bay for di e di cinco luga pa di tres luga na mundo pa loke ta trata e paisnan cu ta gasta mas placa na defensa militar.”

• Merca ta keda e pais cu ta gasta mas placa na defensa militar. Loke nan ta saca ta “ekivalente na 39 porciento di loke mundo en total ta saca na defensa militar.”

Dr. Nan Tian, un di e autornan di e rapport di SIPRI a bisa: “E aumento continuo den inversion militar cu nos ta mira durante e añanan recien ta un indicacion cu nos ta bibando den un mundo cu ta birando mas y mas insigur.”

Bijbel a profetisa cu den nos tempo lo tin mas y mas tension entre e potencianan mundial. Bijbel ta revela tambe e unico speransa pa paz.

Bijbel a bisa adelanta cu lo tin mas conflicto militar

• Bijbel ta yama e tempo cu nos ta biba aden “e tempo den cua e fin lo yega.”—Daniel 8:19.

• E buki Daniel a profetisa cu durante e tempo ey varios potencia mundial lo ta den “conflicto” cu otro. E potencianan mundial aki lo bataya cu otro pa haya mas poder. E bringamento ey lo trece cu ne cu e paisnan lo gasta hopi tesoro, of recurso financiero.—Daniel 11:40, 42, 43.

Pa haya sa mas tocante e profecia biblico interesante aki, wak e video: Kumplimentu di Profesia—Daniel Kapítulo 11.

Con berdadero paz lo ser realisa

• Bijbel ta bisa cu Dios lo reemplasa tur e gobiernonan humano. Dios lo “lanta un reino cu nunca lo ser destrui. E reino aki lo no cay bou di dominio di niun otro pueblo. E reino aki lo destrui y pone un fin na tur e reinonan ey, y e reino aki so lo keda pa semper.”—Daniel 2:44.

• Pronto Jehovaa Dios lo haci loke niun hende no por haci: percura pa berdadero paz, paz cu lo dura pa semper. Con Dios lo haci esey? Su Reino, of gobierno celestial, lo destrui tur arma y caba cu tur violencia.—Salmo 46:8, 9.

Pa haya sa kico mas e Reino di Dios lo logra, lesa e articulo: “Bou di e Reino di Dios Lo ‘Tin Abundancia di Paz.’”