SIGUI VIGILA!

Religion y e Guera na Ucrania—Kico Bijbel Ta Bisa?

Wak loke a sali recientemente den prensa tocante e posicion di algun lider religioso prominente relaciona cu e guera na Ucrania:

“Patriarca Kirill, kende ta na cabes di Iglesia Ortodox di Rusia, no a bisa net nada cu ta condena e atakenan di Rusia ... Su Iglesia tabata hiba un campaña sistematico di plama informacion falso tocante Ucrania, y Putin a uza esey pa hustifica e guera.”—EUobserver, 7 di maart 2022.
“Awor, Patriarca Kirill ... a duna di compronde bon cla cu e ta di acuerdo cu su pais a invadi Ucrania; el a indica cu e guera ta parti di un lucha contra pica.”—AP News, 8 di maart 2022.
“Dialuna cu a pasa, Metropolitano Epifanio I di Kiev, lider di Iglesia Ortodox di Ucrania, a bendiciona su hendenan pa ‘bringa contra e invasornan Ruso’ ... [El] a bisa tambe cu no ta un pica pa mata soldaat Ruso.”—Jerusalem Post, 16 di maart 2022.
“Nos [Conseho di Iglesia y di Organisacion Religioso di Ucrania (UCCRO)] ta apoya ehercito di Ucrania y tur hende cu ta defende nos. Nos ta bendiciona nan pa e esfuerso cu nan ta haci pa defende Ucrania contra e pais cu ta ataca nos, y nos ta resa pa nan.”—Declaracion di UCCRO,a 24 di februari 2022.

Kico bo ta pensa? Ta bon pa religion cu ta bisa cu nan ta sigui Cristo anima nan miembronan pa bringa den guera? Kico Bijbel ta bisa?

Religion su rol den guera a traves di historia

Historia ta mustra cu hopi biaha religion a aproba, hustifica y hasta promove guera, mientras cu nan ta haci comosifuera ta paz nan kier logra. Pa varios decada, testigonan di Jehova a hala atencion na e actitud hipocrita ey den religion. Analisa algun ehempel cu a ser menciona den nos publicacionnan.

E articulo “Las cruzadas: ‘trágica ilusión’” ta mustra cu Iglesia Catolico Romano tabata responsabel pa e matanzanan cu a tuma luga den nomber di Dios y di Cristo.
E articulo “La Iglesia Católica y África” ta duna un ehempel con religion no a preveni guera entre e tribunan ni genocidio.
E articulonan “¿Tiene la culpa la religión?”, “El papel de la religión en las guerras” y “La religión toma partido” ta splica con pastoor catolico, ortodox y protestant a apoya ambos banda den hopi guera.

Religion cristian tin mag di apoya guera?

Loke Hesus a siña hende: “Stima bo prohimo mescos cu bo mes.” (Mateo 22:39) “Sigui stima boso enemigonan.”—Mateo 5:44-47.

Pensa riba esaki: Si un religion ta anima su miembronan pa mata otro hende den guera, e por bisa cu e ta obedece Hesus su mandamento pa stima otro hende? Pa haya e contesta, lesa e articulonan “Los cristianos verdaderos y la guerra” y “¿Es posible amar a un enemigo?”

Loke Hesus a siña hende: “Mi reino no ta parti di e mundo aki. Si mi reino tabata parti di e mundo aki, mi sirbidornan lo a bringa pa mi no ser entrega den man di e Hudiunan.” (Juan 18:36) “Hinca bo spada bek na su luga, pasobra ken cu uza spada lo muri pa medio di spada.”—Mateo 26:47-52.

Pensa riba esaki: Si e cristiannan no tabatin mag di bringa pa defende ni sikiera Hesus, nan lo tin mag di uza arma pa bringa pa cualkier otro motibo? Lesa e articulo “El cristianismo y la guerra: ¿son compatibles?”, y lo bo mira con e prome cristiannan a sigui Hesus su ehempel y aplica su siñansanan fielmente.

Kico lo pasa cu religion cu ta promove guera?

Bijbel ta siña cu Dios ta rechasa tur religion cu ta pretende cu nan ta representa Hesus pero cu no ta aplica su siñansanan.—Mateo 7:21-23; Tito 1:16.

E buki Revelacion ta mustra cu Dios ta tene e religionnan ey responsabel pa morto di “tur [hende] cu a ser mata riba Tera.” (Revelacion 18:21, 24) Si bo kier sa dicon Dios ta mir’e asina, lesa e articulo “¿Qué es Babilonia la Grande?”
Hesus a indica cu mescos cu ta kap un palo cu ta pari fruta putri y tir’e den candela, asina tur religion cu Dios ta rechasa lo ser destrui pa e cosnan malo cu nan a haci. (Mateo 7:15-20) Lesa e articulo “Fin di Religion Falso Ta Cerca!”, y lo bo haya sa con esey lo sosode.

Testigonan di Jehova Ta Otro

Testigonan di Jehova na Rusia y Ucrania, mescos cu esnan na tur otro parti di mundo, ta obedece Hesus su mandamento pa keda neutral den asunto politico y pa no participa den guera. Pa e motibo ey, nos no ta participa den e conflicto aki ni niun otro conflicto. Nos no ta apoya nan tampoco. Algun testigo di Jehova ta ser persigui pasobra nan ta determina pa aplica loke nan ta siña for di Bijbel. (Juan 15:19, 20; 2 Timoteo 3:12) Por ehempel, gobierno di Rusia a cera hopi testigo di Jehova den prizon y hasta a tortura algun di nan. Nan a confisca tambe nos luganan di reuni pa adoracion. Pa mas informacion, bishita e website www.jw-russia.org.

Wak e video cu ta mustra con testigonan di Jehova ta ser persigui pa nan fe na Rusia. E video ta cuater minuut, y su tema ta Los testigos de Jehová de Irkutsk se mantienen fieles a pesar de las violentas redadas.
Ta conoci pa hopi tempo cu testigonan di Jehova ta keda neutral den asunto politico. Wak e video Para Firme bou di Oposishon pa mira con nan a keda neutral a pesar di hopi persecucion bou di e regimen nazi na Alemania y tambe persecucion na ex-Union Sovietico.

Nos ta invita bo pa bishita e otro seccionnan riba nos website y siña mas tocante nos creencianan, entre otro, e promesa cu Bijbel ta duna di un futuro sin guera. (Isaias 2:4; Jeremias 29:11) Bo por tuma contacto cu nos libremente pa haya mas informacion.

Reconocemento pa potret, di man robes pa man drechi: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO, esta, Conseho di Iglesia y di Organisacion Religioso di Ucrania, ta inclui 15 iglesia cu ta representa religion ortodox, catolico griego, catolico romano, protestant, evangelico, hudiu y moslim.