Un Cristian Por Participa den Guera?—Kico Bijbel Ta Bisa?

Hopi lider di iglesia ta anima hende pa nan participa den guera, manera nos por a mira den caso di e guera na Ucrania. Siguientemente, tin dos ehempel cu ta mustra con e cleronan, na ambos banda di e conflicto, ta apoya hende pa sostene guera:

• Dia 16 di maart 2022, e corant The Jerusalem Post,  a raporta lo siguiente: “Nos kier gradici tur nos guereronan cu ta defendiendo nan pais natal Ucrania ... Nos ta haci oracion pa boso, y nos ta apoya boso di henter nos curason.”—Metropolitano Epifanio I di Kiev.

• Dia 3 di april 2022, Reuters a skirbi cu cabes di Iglesia Ortodox na Rusia a tene un ceremonia, riba diadomingo, pa e soldaatnan Ruso. Durante su predicashi, el a anima e soldaatnan Ruso pa nan defende nan pais den e guera contra Ucrania.

Awor, kisas bo ta puntra bo mes: Un cristian mester participa den guera? Kico Bijbel ta bisa?

Kico Bijbel ta bisa?

Bijbel ta mustra cu hende cu realmente ta sigui Hesucristo no ta participa den guera.

• “Hinca bo spada bek na su luga, pasobra ken cu uza spada lo muri pa medio di spada.”—Mateo 26:52.

  Un hende cu ta apoya guera of cu ta bringa den guera ta obedeciendo e palabranan ey di Hesus?

• “Mi ta duna boso un mandamento nobo: stima otro; mescos cu ami a stima boso, boso tambe stima otro. Na esaki tur hende lo sa cu boso ta mi discipelnan, esta, si boso ta stima otro.”—Juan 13:34, 35.

  Un hende cu ta apoya guera ta stima otro hende manera Hesus a bisa cu su discipelnan, of su siguidornan, mester haci?

Pa mas informacion, lesa e articulo: “Guera y Cristianismo: Ta Cuadra cu Otro?”

Un cristian mester participa den guera?

Un cristian por keda sin participa den e gueranan cu tin awendia? Si. Bijbel ta mustra cu den nos tempo, durante e periodo cu Bijbel ta yama “e ultimo dianan”, lo tin hende di tur nacion cu lo no “train pa guera” mas. Esey ta na harmonia cu e siñansanan di Hesus.—Isaias 2:2, 4.

• Pa mas informacion, lesa e serie di articulo “Kico Dios Ta Pensa di Guera?” den E Toren di Vigilancia.

Jehova,a “e Dios di paz”, lo libra su pueblo “for di opresion y violencia.” Pronto, esey lo bira realidad pa medio di Dios su Reino celestial.—Filipensenan 4:9; Salmo 72:14.

• Pa mira con esey lo bira realidad, wak e video Kico e Reino di Dios Ta?