Kico Kiermen Ser un Cristian?—Kico Bijbel Ta Bisa?

Rond mundo, hopi hende ta bisa cu masha orguyo cu nan ta cristian. Sinembargo, nan comportacion ta laga hopi di desea; nan ta trata otro hende malo. Nan ta egoista, deshonesto y no ta amabel at all. Tin di nan ta hasta infiel na nan casa. Tur e cosnan ey ta pone hende puntra nan mes: Con un hende cu ta bisa cu e ta cristian mester comporta su mes?

Loke ser un cristian ta nifica

Ta facil pa un hende bisa cu e ta cristian. Pero djis bisa cu bo ta cristian no ta suficiente. Segun Bijbel, un cristian ta un discipel of siguidor di Hesus. (Echonan 11:26) Kico Hesus mes a bisa tocante esey? El a bisa: “Si boso keda fiel na mi palabranan, boso realmente ta mi discipelnan.” (Juan 8:31) Niun hende no ta perfecto, pues, niun hende no por semper haci precies loke Hesus a bisa. Pero un cristian ta haci su best pa aplica loke Hesus a siña hende. Anto hende lo por mira esey na su comportacion y na e decisionnan cu e ta tuma. Ban wak algun ehempel di esey.

Un cristian ta mustra amor

Loke Hesus a bisa: “Mi ta duna boso un mandamento nobo: stima otro; mescos cu ami a stima boso, boso tambe stima otro. Na esaki tur hende lo sa cu boso ta mi discipelnan, esta, si boso ta stima otro.”—Juan 13:34, 35.

Loke Hesus a haci: Hesus tabata stima tur hende; e no tabata egoista. Ademas pa Hesus, no tabata importante si un hende tabatin placa of no, si un hende tabata prominente of di unda un hende tabata. Hesus a cura hende cu tabata malo; el a duna hende cu tabatin hamber cos di come, y el a hasta entrega su bida pa otro hende.—Mateo 14:14-21; 20:28.

Loke un cristian ta haci: Un cristian ta stima otro hende. E ta gusta comparti cu otro hende; e no ta haci distincion di persona, y e ta cla pa pordona. Un cristian ta yuda hende cu ta den necesidad, y e ta dispuesto pa haci sacrificio pa yuda otro hende.—1 Juan 3:16.

Un cristian ta honesto

Loke Hesus a bisa: “Ami ta ... e berdad.”—Juan 14:6.

Loke Hesus a haci: Hesus semper tabata papia berdad, y e tabata honesto den tur loke e tabata haci. Nunca e no a manipula hende pa haci loke e tabata kier, ni e no a laga hende kere cos cu no ta berdad. E tabata conoci como un hende cu ta honesto, hasta ora esey a hinc’e den problema.—Mateo 22:16; 26:63-67.

Loke un cristian ta haci: Un cristian no ta gaña. E ta paga belasting, y e no ta horta. E ta traha duro na su trabou, cumpliendo cu e oranan di trabou cu su doño di trabou ta pag’e p’e. (Romanonan 13:5-7; Efesionan 4:28) E no ta estafa hende, ni spiek na scol, ni pone informacion falso den su c.v. ni riba cualkier otro documento.—Hebreonan 13:18.

Un cristian ta trata hende na un manera amabel

Loke Hesus a bisa: “Bin cerca mi, boso tur cu ta traha duro y cu ta carga, y lo mi refresca boso. Tuma mi yugo riba boso schouder y siña di mi, pasobra mi tin un genio suave y un curason humilde, y boso alma lo keda refresca. Pasobra mi yugo ta suave, y mi carga no ta pisa.”—Mateo 11:28-30.

Loke Hesus a haci: Hesus tabata amabel, y e tabata laga hende sinti cu nan por acerc’e. E tabata laga mucha bin libremente cerca dje. E tabata consola hende cu tabata sufri, y e tabata trata hende cu dignidad y respet.—Marco 10:13-15; Lucas 9:11.

Loke un cristian ta haci: Un cristian ta papia cu hende na un manera amabel; e no ta grosero of onbeschoft ni e no ta papia cos ofensivo. (Efesionan 4:29, 31, 32) E ta mustra interes den otro hende, y e ta busca oportunidad pa yuda nan.—Galationan 6:10.

Un cristian ta keda fiel na su casa

Loke Hesus a bisa: “No laga ningun hende separa loke Dios a uni bou di un yugo.”—Marco 10:9.

Loke Hesus a haci: Aunke Hesus mes no a casa nunca, el a anima pareha casa pa nan ta fiel na otro. (Mateo 19:9) El a spierta hende pa tene cuidou cu cos cu por kibra matrimonio.—Mateo 5:28.

Loke un cristian ta haci: Un cristian ta evita di haci cualkier cos cu ta mustra falta di respet pa su matrimonio. (Hebreonan 13:4) Un esposo y esposa ta trata otro cu amor y respet.—Efesionan 5:28, 33.