Diabel Por Influencia Hende?

E contesta cu Bijbel ta duna

Diabel y e demoñonan tin asina tanto influencia riba hende cu Bijbel ta bisa: “Henter mundo ta den poder di e Malbado.” (1 Juan 5:19) Bijbel ta mustra cu Diabel ta influencia hende den varios manera.

• Engaño. Bijbel ta anima cristiannan pa “para firme contra e trampanan di Diabel.” (Efesionan 6:11) Un di su trampanan ta pa laga hende kere cu su compinchinan ta sirbidornan di Dios.—2 Corintionan 11:13-15.

• Spiritismo. Diabel ta uza spiritista, mirado di destino, practicante di bruheria y astrologia pa engaña hende. (Deuteronomio 18:10-12) Uzo di droga, hipnotismo y tecnica di meditacion pa haci mente bashi tambe ta habri caminda pa e demoñonan influencia hende.​—Lucas 11:24-26.

• Religion falso. Religion cu ta siña doctrina falso ta engaña hende y asina pone nan desobedece Dios. (1 Corintionan 10:20) Bijbel ta yama e siñansanan falso ey “siñansa di demoño.”—1 Timoteo 4:1.

• Posei pa demoño. Bijbel ta papia di hende posei pa mal spirito. E demoñonan ey a yega di haci hende ciego, mudo y hasta pone nan maltrata nan curpa.—Mateo 12:22; Marco 5:2-5.

Con bo por proteha bo mes contra influencia di Diabel?

Bo no tin nodi biba cu e miedo cu demoñonan por influencia bo, pasobra Bijbel ta mustra con bo por resisti Diabel cu exito:

• Busca pa sa ki metodo Diabel ta uza, ya bo no ta bay tras di su “trikinan.”—2 Corintionan 2:11.

• Haya conocemento di Bijbel y aplica loke bo ta siña. Ora bo aplica principio biblico, lo bo ta libra di influencia di Diabel.—Efesionan 6:11-18.

• Deshaci di tur loke tin di haber cu demoño. (Echonan 19:19) Esey ta inclui musica, buki, revista, poster y video cu ta promove practica di spiritismo.