Kico Ta Origen di Halloween?

Loke Bijbel ta bisa

Bijbel no ta haci mencion di Halloween. Halloween ta un fiesta cu hopi hende ta celebra tur aña dia 31 di october. Pero, origen di Halloween y e custumbernan cu hende ta sigui durante e fiesta ey no ta cuadra cu siñansa di Bijbel.

Den e articulo aki

• Origen di Halloween y e custumbernan cu hende ta sigui

• Ta importante pa nos sa kico ta origen di Halloween?

• Di unda e nomber Halloween a bin?

Origen di Halloween y e custumbernan cu hende ta sigui

• Samhain: Samhain tabata un fiesta cu e pueblo Kelta tabata celebra mas cu 2.000 aña pasa. Ta parce cu Halloween a origina di e fiesta ey. Segun The World Book Encyclopedia, “e Keltanan tabata kere cu, durante Samhain, spirito di e mortonan tabata cana rond entre hende bibo, y e hendenan bibo por a bishita e mortonan.”—Wak “Di unda e nomber Halloween a bin?”

• Disfrasa na Halloween y pidi mangel di cas pa cas (trick or treat): Segun un buki, algun Kelta tabata bisti trahe spantoso pa confundi e mal spiritonan. Nan tabata bisti trahe cu tabata laga nan parce spirito pa e spiritonan kere cu nan tambe ta spirito y asina laga nan na paz. Otro hende tabata ofrece e spiritonan mangel pa nan no haci nan daño.a

  

  Hopi tempo pasa (entre aña 500 despues di Cristo y aña 1500 despues di Cristo) na Europa, algun clero di iglesia catolico a adopta varios custumber pagano. Nan tabata laga nan miembronan disfrasa nan mes y cana di cas pa cas pa pidi hende regalo.

• Mal spirito, vampiro, homber lobo, heks y zombi: Pa hopi tempo caba, hende ta asocia e personahenan ey cu mal spirito. E buki Halloween Trivia ta yama nan “monster sobrenatural.” Segun e buki, e monsternan sobrenatural tin “hopi di haber cu morto, difunto y cu miedo di muri.”

• Lampi di pampuna (jack-o’-lantern): Hopi tempo pasa, na Gran Britania, hende tabatin e custumber di “bay di cas pa cas pa pidi cuminda a cambio di un oracion na fabor di e mortonan.” Nan tabata cana cu un lanterna traha di un berdura cu na Ingles yama turnip (na Spaño, nabo). Den e lanterna ey tabatin un bela cendi. “E belanan cu tabatin den e lanternanan a representa e almanan cu tabata atrapa den purgatorio.” (Halloween—From Pagan Ritual to Party Night) Algun historiador ta bisa cu e hendenan tabata uza e lanternanan ey pa core cu mal spirito. Durante siglo 19, e hendenan na Merca a cuminsa uza pampuna en bes di turnip pasobra tabata facil pa haya pampuna. Tabata mas facil tambe pa saca contenido di un pampuna y traha dibuho den dje.

Ta importante pa nos sa kico ta origen di Halloween?

Si. Algun hende ta kere cu Halloween ta djis un fiesta inofensivo cu no ta perhudica ningun hende. Pero e cosnan cu hende ta haci durante Halloween no ta cuadra cu siñansa di Bijbel. Halloween tin di haber cu creencia falso tocante demoño (esta, spirito malbado) y hende morto.

E siguiente versiculonan di Bijbel ta mustra kico ta Dios su punto di bista tocante cierto fiesta manera Halloween:

• “Entre boso no mag wordo haya ningun hende cu ta ... montado of spiritista, of cu ta consulta cu e mortonan.”—Deuteronomio 18:10-12, Beibel Santu.

  Nificacion: Dios no kier pa hende busca contacto cu hende morto. E no kier pa hende ni sikiera haci comosifuera cu nan ta purba di drenta den contacto cu hende morto.

• “E mortonan no ta consciente di absolutamente nada.”—Eclesiastes 9:5.

  Nificacion: E mortonan no ta consciente di nada; pues, nan no por comunica cu hende bibo.

• “Ami no ke pa boso tin niun tipo di relashon ku demoño. Boso no por bebe for di e kopa di Señor i tambe for di e kopa di demoño.”—1 Corintionan 10:20, 21, Beibel na papiamentu koriente.

  Nificacion: Hende cu kier tin aprobacion di Dios mester evita tur cos cu tin di haber cu demoño.

• “Para firme contra e trampanan di Diabel; pasobra nos lucha ... ta ... contra forsanan spiritual di maldad.”—Efesionan 6:11, 12.

  Nificacion: Un cristian no mester tin nada di haber cu e demoñonan ni haci comosifuera e ta gosa hunto cu nan tampoco.