For di Nos Lectornan

Halloween Relaciona cu boso articulo “Celebracionnan Popular Ta Dibirticion Inofensivo?” (8 di october 2001), lo mi kier clarifica algo. Boso ta referi na “Anochi di Guy Fawkes”, tambe conoci popularmente como anochi di candela grandi na Gran Bretania. Anochi di Guy Fawkes sigur ta un fiesta cu cristiannan mester evita. E ta un fiesta politico, cu ta glorifica ehecucion di un homber. Pero aunke e fecha di e fiesta aki (5 di november) ta pega cu Halloween y tin algun similaridad entre anochi di candela grandi y Halloween, anochi di candela grandi no ta parti di e fiesta spiritista di Halloween.

P. B., Gran Bretania

“Spierta!” ta contesta: Nos a scohe Halloween como un ehempel di un custumber popular cu tin un origen desagradabel. Anto nos a menciona e Fiesta di Lanterna di Taiwan y Anochi di Guy Fawkes como celebracionnan cu ‘parce’ Halloween den algun aspecto. Sinembargo, no tawata nos intencion pa conecta e dos celebracionnan aki cu Halloween of indica cu nan tin mesun origen. Pero, en bista di nan similaridad cu Halloween—un celebracion cu claramente tin conotacion spiritista—lectornan ta haci bon di considera e origen di e fiestanan aki ora di dicidi si nan lo participa den nan of no.

Danki pa mustra con Halloween ta conecta cu spiritismo. Hende ta mir’e como algo inofensivo y dibirtido, pero tin personanan cu a haya nan den problema serio pa motibo di dje. Muchanan cu ta cana rond anochi por haci nan mes daño of haya mangel cu cos malo aden. Tawatin un mucha mohe den mi bario cu nan mester a hiba hospital. Algun teenager ta sinti cu Halloween ta un ocasion pa cana rond riba caya y causa daño na cas di hende. Un doño di cas a parti mangel cu bon intencion, pero su generosidad a salie di malo; un mucha a gaña riba dje y acus’e falsamente di ta parti mangel cu cos malo aden. Apesar di tur esaki, Halloween ainda ta un celebracion grandi den mi bario. Mi ta spera cu tur mi biciñanan lo lesa boso excelente articulo.

G. H., Merca

Hende Mohe Maltrata Danki pa e serie di portada “Yudansa pa Hende Muher Maltratá.” (8 di november 2001) Na mucha mi a mira con mi tata tawata maltrata mi mama tur dia. Anto despues el a cuminsa maltrata ami cu mi ruman mohenan. Mi a crece cu un odio profundo contra hende homber. Pero cu tempo nos a cuminsa studia Bijbel cu Testigonan di Yehova. No tawata facil pa Tata cambia su manera, pero cu Yehova su yudansa el a bin realisa cu e no por agrada Dios si e ta maltrata Su bunita creacion. E cambionan a tuma luga pocopoco, pero awor mi tata ta manso manera un carne. Mi por stim’e di curason.

G. B., Merca

Leif Eriksson Mi kier gradici boso pa e articulo “Leif Eriksson—Ta E A Descubri America?” (8 di october 2001) Nos ta siñando tocante Columbus den nos lesnan di historia. Ora mi meneer di scol a bisa nos cu ta Columbus a descubri America, mi a hisa man y a bisa cu mi a lesa cu podise ta Leif Eriksson a descubri America 500 aña mas prome. Mi a haci algun investigacion mas, y a print otro articulonan di Spierta! tocante Columbus. Mi meneer a lesa nan tur y a keda impresiona cu tur loke mi a haya.

M. D., Alemania

Lesamento di Bijbel Danki pa boso articulo “Hobennan Sa Puntra . . . Con Mi Por Haci Lesamento di Bijbel Mas Placentero?” (8 di september 2001) Semper mi tawata pensa cu lesamento di Bijbel ta algo laf y cu nunca lo mi caba di lesa henter un buki diki asina. Pero ora mi a purba lesa e Bijbel—despues di a lesa e articulo aki—mi a ripara cu e ta masha interesante. Awor mi ta lesa Bijbel cu regularidad.

M. S., Alemania