Con Bo Por Vence Miedo di Morto?

E contesta cu Bijbel ta duna

Nos tin bon motibo pa mira morto como nos enemigo y tuma medida realistico pa proteha nos bida. (1 Corintionan 15:26) Pero un miedo exagera di morto basa riba creencia falso of supersticion ta pone hende biba “den sclavitud henter nan bida.” (Hebreonan 2:15) Ora bo haya sa e berdad, lo e libra bo di un miedo exagera di morto, pasobra e miedo ey por kita bo goso di bida.—Juan 8:32.

E berdad tocante morto

• E mortonan no sa nada. (Salmo 146:4) Bo no tin nodi tin miedo cu lo bo pasa dolor of sufri despues cu bo muri, pasobra Bijbel ta compara morto cu soño.—Salmo 13:3; Juan 11:11-14.

• E mortonan no por haci nos daño. Hasta hende cu un tempo tabata violento ta “impotente den morto.” (Proverbionan 21:16) Bijbel ta bisa cu “nan odio y nan celo a perece caba.”—Eclesiastes 9:6, Beibel Santu.

• Morto no necesariamente ta e fin definitivo di nos existencia. Pa medio di un resureccion, Dios lo trece hende cu a muri bek na bida.—Juan 5:28, 29; Echonan 24:15.

• Dios ta priminti cu lo yega e dia cu “lo no tin morto mas.” (Revelacion 21:4) Relaciona cu e dia ey, Bijbel ta bisa: “E hustonan lo hereda e Tera, y lo biba den dje pa semper.” (Salmo 37:29, Beibel Santu) E ora ey nan lo ta completamente liber di miedo di morto.