Kico e Palabra di Dios Ta? E Por Referi Tambe na un Persona?

E contesta cu Bijbel ta duna

Den Bijbel, e expresion “e palabra di Dios” hopi biaha ta referi na un mensahe of un coleccion di mensahe di Dios. (Lucas 11:28) Tin biaha, “Palabra di Dios” of “e Palabra” ta ser uza como titulo di un persona.—Revelacion 19:13; Juan 1:14.

Un mensahe di Dios. Hopi biaha, e profetanan a bisa cu e mensahenan cu nan tabata proclama tabata palabra di Dios. Por ehempel, Jeremias a introduci su mensahe profetico cu “e palabra di SEÑOR a yega na mi.” (Jeremias 1:4, 11, 13; 2:1, Beibel Santu) Prome cu profeta Samuel a bisa Saul cu Dios a scoge Saul como rey, e profeta a bisa: “Keda para awor, pa mi proclama e palabra di Dios na bo.”—1 Samuel 9:27, Beibel Santu.

Titulo di un persona. “E Palabra” ta aparece tambe den Bijbel como un titulo pa Hesucristo, tanto como un spirito den cielo y como un hende riba Tera. Laga nos wak algun motibo pakico nos a yega na e conclusion aki:

• E Palabra tabat’ey prome cu tur otro creacion. “Na cuminsamento e Palabra tabat’ey ... E tabata hunto cu Dios na cuminsamento.” (Juan 1:1, 2) Hesus ta “e prome di tur creacion ... E tabata existi prome cu tur otro cos.”​—Colosensenan 1:13-15, 17.

• E Palabra a bin na Tera como un hende. “E Palabra a bira hende y a biba meymey di nos.” (Juan 1:14) Cristo Hesus “a entrega tur loke e tabatin y a tuma un condicion di esclavo y a bira hende.”—Filipensenan 2:5-7.

• E Palabra ta e Yiu di Dios. Despues cu apostel Juan a bisa cu “e Palabra a bira hende”, manera a ser menciona, el a sigui bisa: “Nos a mira su gloria, un gloria cu un yiu unigenito ta ricibi di un tata.” (Juan 1:14) Juan a skirbi tambe: “Hesucristo ta e Yiu di Dios.”—1 Juan 4:15.

• E Palabra tin cualidadnan di un dios. “E Palabra tabata un dios” of tabata “divino.” (Juan 1:1, nota) Hesus ta “refleho di e gloria di Dios y copia exacto di su personalidad.”—Hebreonan 1:2, 3.

• E Palabra ta un rey. Den Bijbel, nos ta lesa cu riba cabes di e Palabra di Dios “tin hopi corona.” (Revelacion 19:12, 13) E Palabra tambe ta ser yama “Rey di reynan y Señor di señornan.” (Revelacion 19:16) Hesus ta ser yama “Rey di esnan cu ta goberna como rey y Señor di esnan cu ta goberna como señor.”—1 Timoteo 6:14, 15.

• E Palabra ta e vocero di Dios. Aparentemente, Dios ta uza e persona cu tin e titulo “e Palabra” pa duna informacion y instruccion. Hesus a bisa cu e tabatin e tarea aki: “E Tata cu a manda mi a duna mi ordo tocante kico pa bisa y kico pa siña hende. ... Pesey loke mi ta papia, mi ta papia precies manera e Tata a bisa mi.”​—Juan 12:49, 50.