Dicon Hesus Ta Ser Yama Yiu di Dios?

Loke Bijbel ta bisa

Hopi biaha, Bijbel ta yama Hesus “e Yiu di Dios.” (Juan 1:49) E expresion “Yiu di Dios” ta duna di compronde cu Dios ta Creador, of Fuente, di tur bida, incluso bida di Hesus. (Salmo 36:9; Revelacion 4:11) Bijbel no ta bisa cu Dios ta un tata di e mesun manera cu hende ta haya yiu.

Bijbel ta yama e angelnan tambe “e yiu hombernan di Dios.” (Job 1:6) Ademas, Bijbel ta bisa cu e prome hende, Adam, tabata un “yiu di Dios.” (Lucas 3:38) Sinembargo, Bijbel ta yama Hesus e Yiu di mas importante di Dios pa motibo cu Hesus tabata e prome creacion di Dios y e unico persona cu Dios a crea directamente.

• Hesus a biba den cielo prome cu el a nace riba Tera?

• Kico Hesus a haci prome cu el a bin na Tera?

Hesus a biba den cielo prome cu el a nace riba Tera?

Si. Hesus tabata un angel den cielo prome cu el a nace como hende riba Tera. Hesus mes a bisa: “Mi ... a baha for di cielo.”—Juan 6:38; 8:23.

Dios a crea Hesus prome cu el a crea tur otro cos. Bijbel ta bisa tocante Hesus:

• “E ta ... e prome di tur creacion.”—Colosensenan 1:15.

• E ta “e prome prome creacion di Dios.”—Revelacion 3:14.

Hesus a cumpli cu e profecia tocante esun cu “su origen ta for di hopi tempo pasa, for di e dianan di eternidad.”—Mikeas 5:2; Mateo 2:4-6.

Kico Hesus a haci prome cu el a bin na Tera?

E tabatin un puesto halto den cielo. Hesus a referi na e puesto ey ora el a resa: “Tata, duna mi gloria ... e mesun gloria cu mi tabatin banda di bo prome cu mundo a existi.”—Juan 17:5.

El a yuda su Tata crea tur otro cos. Hesus a traha hunto cu Dios “manera un trahador experto.” (Proverbionan 8:30) Bijbel ta bisa tocante Hesus: “Pa medio di dje tur otro cos a ser crea, tanto den cielo como riba Tera.”—Colosensenan 1:16.

Dios a crea tur otro cos pa medio di Hesus, for di e angelnan den cielo te na e universo. (Revelacion 5:11) Den un sentido, nos por compara e cooperacion entre Dios y Hesus cu e cooperacion cu tin entre un arkitecto y un contratista. E arkitecto ta diseña e edificio, y e contratista ta uza e diseño pa construi e edificio.

E tabata e Palabra. Ora ta referi na Hesus prome cu el a bin na Tera, Bijbel ta yam’e “e Palabra.” (Juan 1:1) Esey kiermen cu Dios a uza su Yiu pa transmiti informacion y instruccion na e otro angelnan.

Ta parce tambe cu Hesus a sirbi como e Vocero di Dios pa hende aki riba Tera. Probablemente, Dios a papia pa medio di Hesus, esta, e Palabra, ora el a duna instruccion na Adam cu Eva den e hofi di Eden. (Genesis 2:16, 17) Kisas Hesus tabata e angel cu a guia e Israelitanan di antiguedad den desierto y kende su stem e Israelitanan mester a obedece estrictamente.—Exodo 23:20-23.a