Proyectonan di Construccion Cu A Tuma Luga Prome cu e Pandemia

Tur aña centenares di miles di hende ta batisa. Pesey, nos tin mester di mas y mas edificio pa adora Jehova. Pa e motibo ey, Departamentonan Local di Diseño y Construccion rond mundo a plania pa construi of renoba mas cu 2.700 luga di adoracion durante e aña di sirbishi 2020.a

Lamentablemente, e pandemia di COVID-19 a stroba e plannan aki. Pa proteha nos rumannan y cumpli cu regla di gobierno, Comite di Publicacion di Cuerpo Gobernante a stop mayoria di e proyectonan di construccion rond mundo temporalmente. Sinembargo, durante e aña di sirbishi 2020, nan a logra construi y renoba mas cu 1.700 luga di adoracion prome cu e pandemia a cuminsa. Ademas, nan a caba cu mas cu 100 di e proyectonan grandi di construccion di diferente sucursal. Ban wak con dos di e proyectonan aki a beneficia nos rumannan.

Sucursal di Camerun. E sucursal bieu cu tabata keda den e stad Douala tabata mucho chikito y tabatin mester di un renobacion grandi. Comite di Publicacion a pensa pa renoba e sucursal, pero e gastonan pa haci esey lo a surpasa e balor di e edificionan. Ademas, nan a haci investigacion pa mira si ta posibel pa construi riba un tereno nobo of pa cumpra un edificio y renob’e. Pero niun di e opcionnan ey no tabata posibel.

Mientrastanto, e rumannan a haya sa cu gobierno tabatin plan di traha un caminda banda di un di nos Salonnan di Asamblea na e parti noord di Douala. Construccion di e caminda ey lo a hacie mas facil pa yega eynan y pa haya awa, coriente, telefon, Internet, etcetera. Esey tabata exactamente loke e sucursal tabatin mester. Pues, Cuerpo Gobernante a aproba construccion di un sucursal nobo riba tereno di e Salon di Asamblea.

Pa acelera e trabou y spaar placa testigo di Jehova boluntario a traha hunto cu contratista paga riba e proyecto. De echo, e proyecto a sali mas cu dos miyon dollar menos di loke nan a spera. E famia di Betel a logra muda pa e sucursal nobo net prome cu e pandemia di COVID-19 a cuminsa.

Awor e betelitanan na Camerun tin un mihor luga pa biba y traha, y nan ta mira e sucursal nobo como un regalo di Jehova. Un pareha a bisa: “Nos kier traha mas duro y mustra nos aprecio pa e regalo aki di Jehova.”

Oficina di Traduccion (RTO) di Tojolabal, na Mexico. Pa hopi aña, e team di traduccion di idioma Tojolabal tabata na e sucursal di Centro America, cu no ta mucho leu for di Ciudad di Mexico. Sinembargo, hende tabata papia Tojolabal principalmente den e stadnan Altamirano y Las Margaritas. E stadnan ey ta keda casi 1.000 kilometer leu for di e sucursal! Como resultado, tabata dificil pa e traductornan keda al dia cu e idioma. Ademas, tabata dificil pa sucursal haya ruman cualifica den bisindario pa yuda cu e trabou di traduccion y e grabacionnan na Tojolabal.

Pa e motibonan aki, Comite di Redaccion di Cuerpo Gobernante tabata kier pa e team di traduccion di Tojolabal muda bay caminda nan ta papia e idioma ey. Pues, sucursal a dicidi di cumpra un edificio y renob’e. Esey tabata mas barata cu construi of huur oficina.

Un traductor ta splica con esaki a benefici’e: “Den e ultimo dies añanan cu mi a traha como traductor na sucursal, mi no a topa ni un famia den bisindario cu ta papia mi idioma. Awor nos oficina ta keda net meymey di caminda nan ta papia Tojolabal. Pues, tur dia mi por papia cu hende na Tojolabal. Esaki a yuda mi amplia mi vocabulario y haci mi trabou mihor.”

Proyecto di Construccion pa e Aña di Sirbishi 2021

Pa e aña di sirbishi 2021, si circunstancia permiti, tin plan pa traha riba 75 proyecto. Esey ta inclui RTO y luga pa tene e scolnan biblico. Nos lo sigui traha riba 8 proyecto grandi na diferente sucursal. Esey ta inclui construccion di e edificionan nobo di Sede Mundial na Ramapo, New York, y e proyecto pa muda e sucursalnan di Argentina y Italia. Pero esey no ta tur. Nos tin mester di mas cu 1.000 Salon di Reino nobo. Di otro banda, mas cu 6.000 di e luganan unda nos rumannan ta reuni no ta adecuado y mester ser reemplasa y tin 4.000 Salon di Reino mas cu tin cu ser renoba.

Con e trabounan aki di construccion y renobacion ta ser financia? Ruman Lázaro González, un miembro di Comite di Sucursal di Centro America, a contesta e pregunta aki ora e tabata papia tocante e proyecto di construccion di e oficina di traduccion di Tojolabal. “E rumannan den e teritorio di nos sucursal tin poco recurso. Pues, si no ta pa e apoyo di henter e hermandad mundial, lo tabata imposibel pa traha un oficina di traduccion pa nos rumannan cu ta papia idioma indigena. Donacion di e rumannan rond mundo ta yuda e traductornan muda bay caminda e idioma ta ser papia. Nos ta gradici nos hermandad mundial pa nan apoyo generoso.” Si, e proyectonan di construccion aki ta posibel danki na boso contribucion na e obra mundial. Hopi di e donacionnan aki ta ser haci via donate.jw.org.