Dicon Ta Importante pa Mi Ta na Paz cu Mi Rumannan?

• “Bo mihor y pio amigonan”

• Dos motibo pa haci paz

• Loke otro hobennan ta bisa

“Bo mihor y pio amigonan”

Hende sa bisa cu bo rumannan por ta “bo mihor y pio amigonan.” Bo ta stima nan y nan ta stima bo, pero tin biaha boso djis no por bay bon cu otro. Helena di 18 aña ta bisa: “Mi ruman homber chikito ta traha riba mi nervio. E sa precies kico pa haci pa pone mi perde cabes!”

Tin biaha boso mester djis papia pa yega na un acuerdo y soluciona algun di e problemanan ey. Por ehempel:

• Dos ruman homber cu tin cu drumi den e mesun camber por pleita cu nan no tin privacidad. Kico por ta e solucion? Mustra respet na otro y duna otro e espacio cu e mester. Aplica e principio di Bijbel cu tin na Lucas 6:31.

• Dos ruman muher ta bisti paña di otro sin puntra. Kico por ta e solucion? Papia tocante e asunto y pone limitenan rasonabel. Aplica e principio di Bijbel cu tin na 2 Timoteo 2:24.

Den algun caso, problema entre rumannan por ta mas serio y por tin consecuencianan mas serio tambe. Laga nos wak dos ehempel for di Bijbel:

• Miriam cu Aaron tabata jaloers riba nan ruman homber Moises y esey tabatin un resultado tristo. Lesa e relato na Numbernan 12:1 pa 15. Awor puntra bo mes: Con mi por evita cu mi ta bira jaloers riba mi ruman?

• Cain su rabia a yega te na e punto cu el a mata su ruman homber Abel. Lesa e relato na Genesis 4:1 pa 12. Awor, puntra bo mes: Con mi por controla mi rabia ora mi ta atende cu mi ruman?

Dos motibo pa haci paz

Sin importa con dificil por ta pa ta na paz cu bo rumannan, tin por lo menos dos motibo pakico ta bale la pena pa haci e esfuerso ey.

1. Bo ta mustra cu bo ta madura. Un hoben cu yama Alex ta bisa: “Mi tabatin e custumber di rabia lihe cu mi dos rumannan muher mas chikito. Awor mi ta hopi mas trankil y mi tin mas pasenshi pa deal cu nan. Bo por bisa cu mi a crece y a madura.”

   Bijbel ta bisa: “Esun cu no ta rabia lihe tin gran comprondemento, ma esun cu ta rabia lihe ta halsa bobedad.”—Proverbionan 14:29, Beibel Santu.

2. Bo ta prepara pa futuro. Si bo no por soporta e imperfeccionnan di bo rumannan, con lo bo bay deal cu un casa, un colega di trabou, un doño di trabou of cualkier otro persona cu bo tin cu trata cu ne?

   Echo ta cu pa bo por tin relacionnan cu ta bay bon den futuro, bo mester por comunica y yega na un acuerdo. Y no tin un mihor caminda pa siña comunica y yega na acuerdo cu den bo famia.

   Bijbel ta bisa: “Te asina leu cu ta depende di [bo], keda na paz cu tur hende.”—Romanonan 12:18.